खबरमाला संवाददाता अमेरिकाकी उपराष्ट्रपति कमला ह्यारिस डेमोक्र्याटिक पार्टीबाट राष्ट्रपतिको उम्मेदवार बनेकी छन्। उनले दलका प्रतिनिधिबाट सबैभन्दा बढी मत प्राप्त गरेकी हुन्। ह्यारिसले यही महिनाको अन्त्यमा सिकागोमा हुने डेमोक्र्याटिक राष्ट्रिय महाधिवेशनअघि सम्भावित उम्मेदवारका रूपमा छनोट हुन पाउँदा आफूलाई सम्मानित महसुस भएको बताइन्। ह्यारिस पहिलो अश्वेत महिला र दक्षिण एसियाली मूलकी पहिलो महिला हुन्, जसलाई प्रमुख अमेरिकी पार्टीको राष्ट्रपतिको उम्मेदवारका रूपमा छनोट गरिएको छ।
उनले नोभेम्बरमा हुने चुनावमा रिपब्लिकन उम्मेदवार डोनाल्ड ट्रम्पलाई हराइन् भने उनी अमेरिकाको पहिलो महिला राष्ट्रपति बन्नेछिन्। राष्ट्रपति जो बाइडेनले आफूलाई राष्ट्रपतिको दौडबाट अलग गर्दै ह्यारिसलाई समर्थन गरेका थिए। ह्यारिस स्थानीय समय शुक्रबार दिउँसो २ हजार ३५० डेमोक्र्याटिक प्रतिनिधिबाट समर्थन प्राप्त गरेपछि औपचारिक रूपमा राष्ट्रपतिको उम्मेदवार बनेकी हुन्।
ह्यारिसले उपराष्ट्रपति उम्मेदबारका लागि ६ जनाको सुची तयार गरेको समाचार छ । उनीहरुसँग यसै सप्ताहन्तमा अन्तरवार्ता लिएर निश्चित गर्ने बताइएको छ । उनले उपराष्ट्रपतिको सुचिमा केन्टकीका गभर्नर एन्डी बेशियर, इलिनोयका जेबी प्रिट्जकर, पेन्सिल्भेनियाका जोश शापिरो र मिनेसोटाका टिम वाल्जका साथै ट्रान्सपोर्टेशन सेक्रेटरी पीट बुटाजज र सिनटेर मार्क केलीमध्येबाट एकजना छनौट गर्ने बताइएको छ ।
क्यालिफोर्नियामा भारतीय आमा र जमैकाका बुबाबाट जन्मिएकी ह्यारिस अमेरिकाको लगभग २५० वर्षको इतिहासमा प्रमुख दलका तर्फबाट राष्ट्रपतिको उम्मेदबार बन्ने दोश्रो अश्वेत व्यक्ति बनेकी छिन्। रिपब्लिकन उम्मेदबार डोनाल्ड ट्रम्पलाई पराजित गरेमा उनी राष्ट्रको पहिलो महिला र पहिलो एसियाली मूलकी अमेरिकी राष्ट्रपति हुनेछिन्।
