ट्रम्प प्रशासनमाथी एकपछि अर्को धक्काः ट्रेजरी डिपार्टमेन्ट रेकर्ड हेर्न नपाउने अदालतको आदेश

ट्रम्प प्रशासनमा अर्बपति एलन मस्कको नेतृत्त्वमा रहेको सरकारी दक्षता विभागलाई अमेरिकी सरकारको ट्रेजरी डिपार्टमेन्ट रेकर्डमा रहेका लाखौं अमेरिकीहरूको व्यक्तिगत वित्तीय डेटा पहुँच गर्नबाट अदालतले रोक लगाएको छ । ट्रम्प प्रशासनले गरेको केहि कामहरुमाथी एक पछि अर्को गर्दै अदालतले रोक लगाउँदै आएको छ हो । अमेरिकाका जिल्ला न्यायाधीश पौल ए एन्जलमेयरले शनिबार एक प्रारम्भिक आदेश जारी गर्दै मस्क र उनको टोलीलाई पहुँचमा प्रतिबन्ध लगाउनुका साथै रेकर्डका प्रतिलिपि नष्ट गर्न पनि आदेश दिएको अमेरिकी सञ्चार माध्यमले जनाएका छन् ।

मस्क नेतृत्त्वको सरकारी दक्षता विभागलाई अमेरिकी नागरिकको अतिगोप्य व्यक्तिगत वित्तीय डेटामा पहुँच दिइएपछि १९ राज्यका महान्यायाधिवक्ताले ट्रम्प प्रशासनविरुद्ध मुद्दा दायर गरेका थिए । सोही मुद्दाउपर एन्जलमेयर सरकारी दक्षता विभागलाई पहुँच नदिन प्रारम्भिक आदेश दिएका हुन् ।

एन्जलमेयरले फेब्रुअरी १४ का लागि सुनुवाई तोकेका छन् ।

मस्कको नेतृत्वमा लागत घटाउने पहल डोगेलाई रेकर्डमा पहुँच दिइएपछि १९ राज्यका महान्यायाधिवक्ताले ट्रम्प प्रशासनविरुद्ध मुद्दा दायर गरेपछि यो कदम आएको हो। महान्यायाधिवक्ताले मस्क विशेष सरकारी कर्मचारी नभएको र विभाग पनि आधिकारिक नभएकाले संघीय कानुनको उलंघन गरेको तर्क गरेका थिए ।

अदालतले पहुँचमा प्रतिबन्ध लगाएपछि मस्कले सामाजिक सञ्जाल एक्समा ‘पागलपन’को संज्ञा दिँदै प्रतिक्रिया दिएका छन् । उनले भनेका छन्, ‘पृथ्वीमा हामीले पैसा कसरी खर्च हुन्छ भनेर नहेरी करदाताको पैसाको ठगी र बर्बादीलाई कसरी रोक्ने रु’