खबरमाला संवाददाता नेपालका लागि युरोपियन युनियनको डेलिगेसनद्वारा आयोजित ‘नेपाल–युरोपियन युनियन फिल्म फेस्टिभल २०२४’ सुरु भएको छ । मार्टिन म्याकडोनागद्वारा निर्देशित ‘द ब्यानसिस अफ इनिसेरिन’ र शान्ता नेपालीको ‘धेय ड्रिम्स’ देखाउँदै महोत्सव सुरु भएको हो ।
युरोपियन युनियन र नेपाल सम्बन्धको ५० वर्ष: सांस्कृतिक विविधताको उत्सव’को नारा बोकेको महोत्सवको १३औं संस्करण चैत १० सम्म चल्नेछ । महोत्सवका फिल्महरु काठमाडौंको सुन्धारास्थित सीटीसी मलमा रहेको सीडीसी सिनेमामा देखाइँदैछन् ।
अभिनेत्री उपासनासिंह ठकुरी र अभिनेता धिरज मगर सद्भावना दूत रहेको महोत्सवमा ९ युरोपियन फिल्मसँगै ११ नेपाली लघु फिल्म देखाइनेछन् । महोत्सवमा युरोपियन फिल्मकर्मी मार्टिन म्याकडोनागसँगै मेरियन ब्लिचर निर्देशित मिस भिर्बोग (डेनमार्क), इम्यानुएल परभु निर्देशित मिकादो (रोमानिया, चेज रिपब्लिक), पिलर पालोमेरो निर्देशित स्कुल गर्ल्स(स्पेन), एन्टोनियो लुकीच निर्देशित लक्जेम्बर्ग लक्जेम्बर्ग (युक्रेन), इभान ओस्ट्रोचोभ्स्की निर्देशित सरभेन्टस् (चेज रिपब्लिक, आयरल्याण्ड, रोमानीया, स्लोभाकीया), भिक्टर बोजिनोभल निर्देशित द नेकेड ट्रुथ अवाउट झिगुली ब्यान्ड (बुल्गेरिया), जाइदा बरग्रोथ निर्देशित टोभ (फिनल्याण्ड) र रोड्रिगो सोरोगोएन निर्देशित द बीस्ट (स्पेन) छन् ।
त्यस्तै, नेपाली फिल्ममा शान्तासँगै गोपाल आचार्य निर्देशित डिभिनेसन् (आखत), समाल बज्राचार्य निर्देशित हावाम्यान, निमा गेलु शेर्पा निर्देशित काठमाडौं मनसुन, अतिन श्रेष्ठ निर्देशित मखमली उडान, रजिन महर्जन निर्देशित लेट्स टक पिरियड, मिराज रोशन ठकुरी निर्देशित रातो पछ्यौरी, आकांक्षा कार्की निर्देशित सनाई, स्वोयन मास्के मानन्धर निर्देशित द बुल, द काउ, द काल्फ, सन्तोष दाहाल निर्देशित द मिराज र अनिल कुर्मी निर्देशित रिल देखाइनेछन् ।
