डब्लूटीओको सेवा व्यापार परिषद् अध्यक्षमा नेपाली राजदूत सुवेदी निर्वाचित

संयुक्त राष्ट्र संघ (जेनेभा) का लागि नेपालका स्थायी प्रतिनिधि रामप्रसाद सुवेदी विश्व व्यापार संगठन (डब्लूटीओ) को काउन्सिल फर ट्रेड इन सर्भिसेस (सीटीएस) अध्यक्ष निर्वाचित भएका छन् ।

डब्लूटीओको गत शुक्रबार भएको जनरल काउन्सिल बैठकले सुवेदीलाई आगामी एक वर्षे कार्यकालका लागि निर्विरोध निर्वाचित गरेको हो । जनरल काउन्सिल अध्यक्ष पिटर ओल्बर्गले डब्लूटीओका विभिन्न समिति अध्यक्षहरूको निर्वाचनका लागि प्रस्ताव गरेका थिए । उनको प्रस्तावमा डब्लूटीओ सदस्यहरूले समर्थन गरेपछि सुवेदी उक्त पदमा निर्वाचित भएका हुन् ।

सीटीएस डब्लूटीओको सेवा व्यपारसँग सम्बन्धित जनरल एग्रिमेन्ट अन द ट्रेड इन सर्भिसेस (ग्याट्स) कार्यान्वयनका लागि ग्याट्सको धारा २४ अन्तर्गत गठित निकाय हो । यसलाई डब्लूटीओका परिषदमध्ये महत्त्वपूर्ण मानिन्छ ।

यसले नेपाललाई ग्याट्सको उद्देश्य प्राप्त गर्न डब्लूटीओ सदस्यबीच बृहत सहकार्य अगाडि बढाउने अवसर प्राप्त भएको जेनेभास्थित नेपाली दूतावासले जनाएको छ ।

यसअघि गत वर्ष सुवेदी कमिटी अन ट्रेड अन डेभलपमेन्ट अध्यक्ष निर्वाचित भएका थिए । सन् २००४ मा नेपालले डब्लूटीओ सदस्यता प्राप्त गरेपछि पहिलो पटक उक्त संगठनको (टायर– १) तहको कमिटी अध्यक्षमा नेपाल निर्वाचित भएको थियो । त्यसको एक वर्षपछि यसपालि उनी अर्को महत्त्वपूर्ण परिषद् अध्यक्ष निर्वाचित भएका हुन् ।

डब्लूटीओ सदस्यबीच सेवा व्यापार क्षेत्रमा सहमति र सहकार्य अभिवृद्वि गर्ने अवसर नेपाललाई  प्राप्त भएको छ । सन् २०२६ फेब्रुअरीमा अफ्रिकी देश क्यामरुनमा हुन लागेको डब्लूटीओको १४औ मन्त्रिस्तरीय बैठक सिलसिलामा यसका सदस्यबीच सेवा व्यापार क्षेत्रमा छलफल गराइ निष्कर्ष निकाल्ने अवसर पनि सुवेदीलाई प्राप्त भएको छ ।

अतिकम विकसित मुलुकका प्रथिमकताका विषय खास गरी ‘सर्भिस वेभर’ प्रभावकारी कार्यान्वयन गर्न र नेपाल लगायत २०२६ मा अतिकम विकसित मुलुकको समूहबाट स्तरोन्नति हुने क्रममा रहेकाका हकमा यो सुविधा निरन्तरताका लागि सहजीकरण गर्न महत्त्वपूर्ण हुने देखिने दूतावासले जनाएको छ ।

राजदूत सुवेदीले सीटीएस अध्यक्षको जिम्मेवारी यस वर्ष दोस्रो नियमित बैठकबाट सरु गर्नेछन् भने २०२६ पहिलो नियमित बैठकसम्म उनी पदमा रहनेछन् ।

हाल जेनेभास्थित राष्ट्र संघका लागि नेपालको स्थायी मिसनमा उपसचिव दुर्गाप्रसाद भुसालले वाणिज्य क्षेत्र हेरिरहेका छन् । उनले डब्लूटीओमा नेपालका तर्फबाट महत्त्वपूर्ण विषयमा समन्वय गरिरहेका छन् ।