पेन्टागनले अमेरिका–मेक्सिको सीमामा थप ५ हजार सैनिक पठाउदै

पेन्टागनले अमेरिका–मेक्सिको सीमामा थप ५ हजार ५० सैनिक पठाउने भएको छ, यद्यपि हालका केही हप्तामा अवैध सीमापार गर्ने घटनाहरू तीव्र रूपमा घटेको भन्दै शुन्यमा झार्न थप सुरक्षा व्यवस्था गरिएको हो । रक्षा सचिव पीट हेगसेथले “अमेरिका–मेक्सिको सीमाको सुरक्षालाई मजबुत बनाउन सैनिक सहयोग बढाउन“ एक स्ट्राइकर ब्रिगेड कम्ब्याट टिम र एक सामान्य समर्थन उड्डयन बटालियन पठाउन आदेश दिएका छन्, पेन्टागनका प्रेस सचिव सीन पार्नेलले शनिबार एक विज्ञप्तिमा जनाएका छन् । प्रत्येक एसबिसिटीमा करिब ४,४०० सैनिक हुन्छन्, जबकि उड्डयन बटालियनमा झन्डै ६५० सैनिक रहेका छन् । यी सेना आगामी हप्ताहरूमा लगभग २ हजार माइल लामो सीमामा पुग्नेछन्, तर उनीहरूलाई विशेष रूपमा कहाँ खटाइनेछ भन्ने खुलाइएको छैन ।

यो तैनाथी राष्ट्रपति ट्रम्पले जनवरीमा पदभार ग्रहण गरेलगत्तै दक्षिणी सीमामा राष्ट्रिय आपत्काल घोषणा गरी अवैध आवागमन रोक्ने उद्देश्यले विभिन्न कार्यकारी आदेशहरू जारी गरेपछि भएको हो । यस प्रयासको भाग स्वरूप, उनले सीमाको सुरक्षा मजबुत गर्न सेना परिचालन गरेका छन्, धेरै आप्रवासीहरूलाई अमेरिका बाहिर पठाएका छन्, र तिनीहरूलाई सैन्य आधारहरूमा राखेका छन् । ट्रम्पले जनवरीमै १६ हजार मरीनहरू सीमामा पठाउने आदेश दिएका थिए, जुन पहिले नै त्यहाँ तैनाथ २५ सय सदस्यहरूमा थपिएको थियो । नयाँ तैनाथीपछि सीमामा खटाइएका सैनिकहरूको संख्या लगभग १०,००० पुग्नेछ ।

गृह सुरक्षा विभागकी सचिव क्रिस्टी नोएमले पनि गत हप्ता खुलासा गरेअनुसार, फेब्रुअरी २२ मा सीमा शुल्क तथा सीमा सुरक्षाले दक्षिणी सीमामा मात्र २०० व्यक्तिलाई पक्राउ गरेको थियो, जुन १५ वर्षभन्दा लामो समयको सबैभन्दा कम एकदिने संख्या हो ।