खबरमाला संवाददाता
वंगलादेशमा चुलिएको राजनीतिक संकटका कारण मोरङको रानी नाकाहुँदै बंगालीहरु नेपाल छिर्न थालेको समाचार छ । समाचार श्रोतले दिएको जानकारी रानी नाकाबाट नेपाल छिर्न खोज्ने वंगालीहरुलाई नेपाली सुरक्षा कर्मीले उतै फर्काइ दिएको हो । प्रहरी श्रोतका अनुसार त्यसरी नेपाल छिर्न खोज्ने एक बंगलादेशी नागरिकलाई नेपाली सुरक्षाकर्मीले भारत तिरै फर्काइदिएका हुन । नेपाल प्रहरी र सशस्त्र प्रहरी बल एपीएफको संयुक्त टोलीले सीमा क्षेत्रमा चेकजाँच गर्ने क्रममा बंगलादेशी नागरिक ४६ वर्षीय उत्तम सरकारलाई मंगलबार दिउँसो भारततिरै फर्काइदिएका हुन् । सरकारले एक जनालाई भेटाएर फर्काए त कति नेपाल छिरे त्यसको एकिन छैन । नेपाल सरकारले बेलैमा ध्यान नदिने हो भने ठुलो सख्यामा शरणार्थी भित्रिने संभावना देखिन्छ ।
कोशी प्रदेश प्रहरी कार्यालयका एक अधिकृतका अनुसार ती बंगालदेशी नागरिक भारतको जोगवनी हुँदै रानी नाकाबाट नेपाल छिर्ने प्रयासमा थिए । त्यसको सुइको पाएपछि प्रहरीले ४६ वर्षीय सर्कारलाई प्रवेशमा रोक लगाएको हो । बंगलादेशमा राजनीतिक संकट चुलिएपछि प्रधानमन्त्री शेख हसिनाले सोमबार पदबाट राजीनामा दिँदै देश छाडेर भारत पुगेकी छन् । लगत्तै बंगलादेशको सेनाले छिट्टै अन्तरिम सरकार गठन गर्ने घोषणा गरिसकेको छ ।
बंगलादेशको राजनीतिक घटनाक्रमपछि नेपाल सरकारले पनि सीमा क्षेत्रबाट गैरकानुनी घुसपैठसम्मको असर नेपालसम्मै देखिने आकलनसहित सीमा क्षेत्रको सुरक्षा व्यवस्था कडा पार्न सबै सुरक्षा निकायलाई सोमबार नै निर्देशन दिइएको बताइएको छ । गृह मन्त्रालयको निर्देशनपछि नेपाल प्रहरी र सशस्त्र प्रहरीले सीमा क्षेत्रमा सुरक्षा जाँचमा कडाई गर्नुका साथै आवागमनमा निगरानीदेखि सम्भावित घुसपैठ रोक्न नियमितबाहेक अतिरिक्त सुरक्षा जनशक्तिसमेत परिचालन गरिसकेका छन् ।
