राष्ट्रपति ट्रम्प नोबेल शान्ति पुरस्कारको बाटोमा छन्: अमेरिकी विदेशमन्त्री रुबियो !

अमेरिकी विदेशमन्त्री मार्को रुबियोले राष्ट्रपति ट्रम्पको युक्रेन र रूसबीचको शान्ति सम्झौताको वार्ताका लागि अपनाएको दृष्टिकोणको कडा बचाउ गर्दै विश्वविख्यात नोबल पुरस्कारका लागि हकदार भएको बताएका छन । उनले भने कि यदि ट्रम्प डेमोक्र्याट हुन्थे भने, मिडिया र जनताले उनको प्रयासको प्रशंसा गर्ने थिए रिपव्लिकन भएकोले राष्ट्रपति ट्रम्पले शान्तिका लागि गरेको प्रयासमाथी आक्रमण भईरहेको बताएका छन । उनले “के हामी सबै खुसी हुनु पर्ने होइन कि हाम्रो राष्ट्रपति युद्ध रोक्न र रोकथाम गर्न प्रयासरत छन्, न कि युद्ध सुरु गर्न?“ रुबियोले एबीसी न्यूजको “दिस वीक“ कार्यक्रममा अन्तर्वार्तामा भने ।

“मलाई यो कुरा बुझ्नै गाह्रो छ । मलाई साँच्चै थाहा छैन, अन्य कारण केहि छैन, केवल यो डोनाल्ड जे. ट्रम्प भएको कारण मात्र हो,“ उनले थपे । “यदि कुनै डेमोक्र्याटले यो काम गरिरहेको भए, सबैले भन्ने थिए, ’उनी नोबेल शान्ति पुरस्कारको बाटोमा छन्,’“ रुबियोले भने । “यो पूर्ण रूपमा असंगत छ ।“ रुबियोले ट्रम्पको रणनीतिको समर्थन गर्दै भने कि यो विगत तीन वर्षदेखि रुसी राष्ट्रपति भ्लादिमिर पुटिनलाई गरिएको गालीगलौजबाट भिन्न छ । बरु, ट्रम्प शान्ति स्थापनाको प्रयास गरिरहेका छन् ।
“हामी युद्ध अन्त्य गर्न प्रयास गरिरहेका छौं,“ उनले भने । “युद्ध अन्त्य गर्न, दुबै पक्ष वार्ताको टेबलमा आउनुपर्छ, र त्यो रूसबाट सुरु हुनुपर्छ । यही कुरा राष्ट्रपति ट्रम्पले बताएका हुन हामीले उनीहरूलाई वार्तामा ल्याउन सम्भव भएजति सबै प्रयास गर्नुपर्छ ।“
यो अन्तर्वार्ता शुक्रबार ओभल अफिसमा भएको विस्फोटक बैठकपछि आएको हो, जहाँ ट्रम्प र उपराष्ट्रपति भ्यान्सले युक्रेनी राष्ट्रपति भोलोदिमिर जेलेन्स्कीलाई कडा आलोचना गरेका थिए । बैठकमा जेलेन्स्कीले पुटिनको युद्धविराम सम्झौता पालना नगर्ने प्रवृत्तिमाथि प्रश्न उठाएपछि ट्रम्प र भ्यान्स आक्रोशित भएका थिए ।