खबरमाला संवाददाता
नेपाली विधार्थीको आकर्षक अध्ययनको गन्तव्य मानिएको बेलायत, अष्ट्रेलिया, क्यानडा, न्यूजिल्याण्डलगायत देशहरुले अन्तर्राष्ट्रिय विधार्थी लैजान कडाई गरिरहदा अमेरिकामा भने नेपाली विधार्थीहरुलाई भिषा दिने क्रममा रेकर्ड तोडिने गरी जारी भएको छ । विगत बर्षहरुमा भन्दा यो बर्ष अर्थात २०२४ मा अमेरिका आउने विधार्थीको भिषा दिने क्रम बढी रहेको तथ्यांकहरुले देखाउँछ । मे महिनामा मात्रै अमेरिकाको विद्यार्थी भिसा पाउने नेपालीहरुको संख्यामा १५ सय भन्दा बढी रहेको छ । त्यो विगत बर्षहरुको तुलनामा निकै बढी हो ।
गत बर्ष मात्रै अमेरिकामा विश्वभरीबाट १० लाख ५७ हजार भन्दा बढी विधार्थीहरुले भिषा पाएका थिए । जसमध्ये १५ हजार ९० जना नेपाली रहेका छन । सन् २०२२ मा ८ हजार नेपालीले अमेरिकामा अध्ययन भिषा पाएका थिए । यो सख्या अघिल्लो बर्षको तुलनामा झण्डै दोब्बर हो । सन् २०२३ मा अमेरिकामा नेपाली विधार्थीहरुले भिषा पाउने प्रतिशत २३ दशमलव ९ प्रतिशतले बढी हो । अन्य गन्तव्य मुलुकहरुमा एकातिर काम नपाउने, अपार्टमेन्ट नपाउने र कलेजहरुले विभिन्न बहानामा झण्झट हुने गरेका छन । अष्ट्रेलियामा कलेज सन्चालकहरुले यसैगरी विधार्थीलाई कम गर्ने हो भने अर्थतन्त्रमा नै असर पर्ने चेतावनी नै दिएका छन ।
अमेरिकामा भिषा पाउन कठिन हुन्छ भन्दै कम मात्र विधार्थीहरुले अप्लाई गर्ने गरेको विभिन्न रर्कडहरुले देखाउँछ । पछिल्लो समय नेपाल स्थित अमेरिकी दुताबासले नेपाली विधार्थीहरुलाई फोकस गरेर राजधानी बाहरि पनि अमेरिकामा कलेज र अध्ययनको अवस्थाका बारेमा गोष्टि सेमिनारहरु गर्न थाले पनि नेपाली विधार्थीहरुको सख्या बढ्दै गएको हो ।
