थाइल्यान्डको बैंककस्थित नेपाली दूतावासले दक्षिणपूर्वी एसियाली राष्ट्रमा अवैध रूपमा सञ्चालित ‘अनलाइन स्क्यामिङ सेन्टर’हरूमा नेपालीलाई पठाउने दुई सयभन्दा बढी मानव तस्करको नाम कारबाहीका लागि पठाएको छ ।
दूतावासले ठूलो संख्यामा मानव तस्करको नाम तथा ठेगाना थप अनुसन्धान र कारबाहीका लागि नेपाल प्रहरीको मानव बेचबिखन अनुसन्धान ब्युरोमा पठाएको हो ।
“हामीले थप अनुसन्धान र कारबाहीका लागि २३५ जनाभन्दा बढीको नाम नेपाल प्रहरीको मानव बेचबिखन अनुसन्धान ब्युरोमा पठाएका छौँ,” थाइल्यान्डका लागि नेपाली राजदूत धनबहादुर वलीले बाह्रखरीसँग भने, “हामीले पीडितहरूबाट उनीहरूको नाम संकलन गरेका हौँ ।”
चालु आर्थिक वर्ष २०८२/८३ सुरु भएयता मात्र थाइल्यान्ड र म्यानमारस्थित नेपाली दूतावासले दक्षिणपूर्वी एसियाली राष्ट्रका अनलाइन स्क्यामिङ सेन्टरमा कार्यरत करिब ७०० नेपालीलाई उद्धार गरी नेपाल फर्काएका छन् ।
