अमेरिकाका पूर्वराष्ट्रपति जो बाइडेनको क्यान्सर शरीरका अन्य भागमा समेत फैलिएको उनका छोरा हन्टर बाइडेनले एक अन्तर्वार्तामा खुलासा गरेका छन्। उनले बाइडेनको रोगलाई “अत्यन्त पीडादायी” र “निकै कमजोर बनाउने” अवस्थाका रूपमा वर्णन गरेका छन्। शुक्रबार बीबीसीको कार्यक्रम ‘न्यूज्नाइट’ सँग कुरा गर्दै हन्टरले भने, “क्यान्सर फैलिएको छ, हड्डीमा मेटास्टेसाइज भएको छ र अझ अगाडि पनि फैलिएको छ। यो देख्न निकै दुःखद छ।” भनिएको छ ।
ह्वाइट हाउस छाडेको केही महिनापछि मे २०२५ मा बाइडेनले आफूलाई आक्रामक प्रकारको प्रोस्टेट क्यान्सर भएको घोषणा गरेका थिए। त्यतिबेला उनको कार्यालयले क्यान्सर “हर्मोनप्रति संवेदनशील” देखिएको र प्रभावकारी रूपमा व्यवस्थापन गर्न सकिने जनाएको थियो। अन्तर्वार्ताका क्रममा हन्टर आफ्ना पिताको स्वास्थ्य अवस्थाबारे कुरा गर्दा भावुक बने। पूर्वराष्ट्रपतिको स्वास्थ्यमा आएको गिरावट देख्नु आफूहरूका लागि “निकै कठिन” भएको उनले बताए।
“अहिले मेरो बुबाको स्वास्थ्यबारे म यति मात्र भन्न चाहन्छु—उहाँले अझ धेरै गुनासो गरिदिए हुन्थ्यो भन्ने लाग्छ, किनभने अवस्था राम्रो छैन,” हन्टरले भने।क्यान्सर फैलिँदै गए पनि ८३ वर्षीय बाइडेन अझै सार्वजनिक जीवनमा सक्रिय र संलग्न रहेको हन्टरले बताएका छन्। पूर्वप्रथम महिला जिल बाइडेनले जुन महिनामा ‘द भ्यु’ कार्यक्रममा बोल्दै क्यान्सरको निदानपछि आफ्ना श्रीमान्को गतिविधि केही “सुस्त भएको” भए पनि उनी अझै व्यस्त रहिरहेको बताएकी थिइन्।
बाइडेनको राजनीतिक सक्रियता भने पछिल्लो समय सीमित देखिन्छ। आगामी नोभेम्बरमा हुने मध्यावधि निर्वाचनको आसपास प्रकाशित हुने भनिएको उनको संस्मरण बाहेक उनी वर्तमान अमेरिकी राजनीतिक घटनाक्रममा विरलै सार्वजनिक टिप्पणी गर्छन्। यद्यपि, जुन महिनामा मेरिल्यान्डमा आयोजित डेमोक्रेटिक पार्टीको एक समारोहमा भाषण गर्दै उनले राष्ट्रपति डोनाल्ड ट्रम्पका वासिङ्टन डीसीमा भइरहेका विभिन्न पुनर्निर्माण तथा सौन्दर्यीकरण परियोजनाको आलोचना गरेका थिए। शुक्रबारको बीबीसी अन्तर्वार्तामा हन्टरले भने, “उहाँ अझै आफ्नो काम गरिरहनुभएको छ। उहाँ यो देशप्रति निकै विश्वास राख्नुहुन्छ।”
अन्तर्वार्ताका क्रममा हन्टरले सन् २०२४ को राष्ट्रपति निर्वाचनअघि डोनाल्ड ट्रम्पसँग भएको चर्चित बहस पनि सम्झिए। क्यालिफोर्नियास्थित आफ्नो घरबाट उक्त बहस हेर्दा आफू “स्तब्ध” भएको उनले बताएका थिए।
