बंगलादेशमा हिजो सम्पन्न भएको ऐतिहासिक निर्वाचनमा बङ्गलादेश नेसनलिस्ट पार्टी ( बीएनपी )ले दुई तिहाई बढी सिट जितेको छ ।
अधिकांश क्षेत्रको मतगणना सकिएको अवस्थामा बीएनपीले संसदका ३०० सिटमध्ये २०० भन्दा बढी सिटमा जित हासिल गरेको छ । यस नतिजा सँगसँगै बीएनपीका प्रमुख तारिक रहमान बङ्गलादेशको नयाँ प्रधानमन्त्रीमा बन्ने करिब निश्चित छ ।
१७ वर्षको निर्वासन र दर्जनौँ अदालती मुद्दाहरू बाबजुद बीएनपीले नेता रहमानलाई बंगलादेशको राजनीतिमा पुनर्स्थापित मात्र गरेको छैन, बरु सन् २०२४ को जुलाई क्रान्ति पछिको नयाँ बंगलादेशको निर्माण गर्ने अनुहारको रुपमा जनअनुमोदन गराएको छ ।
६० वर्षीय रहमान प्रभावशाली जिया परिवारका प्रमुख हुन्, जसले दशकौँदेखि देशको राजनीतिमा प्रभुत्व जमाउँदै आएका छन् । उनका बाबु जियाउर रहमान र आम बेगम खालिदा जिया दुवैले यसअघि बङ्गलादेशको नेतृत्व गरिसकेका छन् ।
