खबरमाला संवाददाता
अघिल्लो अधिवेसन बहिस्कार र विवादकाबीच सकिएको संसदको अर्को बर्खे अधिवेशन शुक्रबारबाट सुरू हुँदैछ। प्रतिनिधि सभाको बैठक दिउँसो २ संघीय संसद भवन नयाँ बानेश्वरमा बस्नेछ। तर राजनीतिक दलहरुबीच देखिएको विवादका कारण संसद चल्ने वा नचल्ने केहि निश्चित छैन । शुक्रबार अधिवेशनको पहिलो दिन भएकाले सभामुख देवराज घिमिरेले राष्ट्रपति रामचन्द्र पौडेलबाट प्राप्त अधिवेशन आह्वान सम्बन्धी पत्रको व्यहोरा पढेर सुनाउने कार्यसूची रहेको छ। सभामुख घिमिरेले राष्ट्रपतिको कार्यालयबाट प्राप्त विधेयक प्रमाणीकरण सम्बन्धी पत्रको व्यहोरा पढेर सुनाउने पनि कार्यसूची रहेको छ।
सभामुखले प्रधानमन्त्री तथा मन्त्रिपरिषद्को कार्यालयबाट प्राप्त कार्यभार थप सम्बन्धी पत्रको व्यहोरा पढेर सुनाउनेछन्। प्रतिनिधि सभा नियमावली, २०७९ को नियम १० अनुसार सभामुखले बैठकको अध्यक्षता गर्न सदस्यहरूको मनोनयन गर्ने कार्यसूची पनि रहेको संसद सचिवालयले जानकारी दिएको छ। बजेट अधिवेशन सुरू भएको सन्दर्भमा शुक्रबार दलीय आधारमा मन्तव्य राख्ने कार्यसूची रहेको पनि संसद सचिवालयले बताएको छ। तर गृहमन्त्रिको सहकारीमा भ्रष्ट्राचार प्रकरणको विषयमा संसदीय छानवीन समिति बनाउनु पर्ने नेपाली काँग्रेसको माग सम्बोधन नभएसम्म संसद चल्न नदिने बताएको छ । जसका कारण संसद नियमित कार्यसूचीमा प्रवेश गर्ने, नगर्नेमा भन्ने अन्यौल छ।
यति हुँदा हुँदै पनि सरकारले आर्थिक वर्ष ०८१र८२ को नीति तथा कार्यक्रम १ जेठमा संसदमा प्रस्तुत गर्ने भएको बताएको छ । सभामुख र दलका सचेतकहरूसँग बिहीबार सिंहदरबार भएको छलफलमा अर्थमन्त्री वर्षमान पुनले १ जेठमा नीति तथा कार्यक्रम प्रस्तुत गर्ने जानकारी गराएका थिए। सरकारको नीति तथा कार्यक्रम राष्ट्रपतिले संघीय संसद्को संयुक्त सभामा प्रस्तुत गर्ने संवैधानिक व्यवस्था छ। संसद् सचिवालयका प्रवक्ता एकराम गिरीले नीति तथा कार्यक्रम प्रस्तुतिका लागि अर्थमन्त्रीबाट मौखिक जानकारी आएको र अब सचिवालयले आवश्यक तयारी थाल्ने बताए।
