कुवेतस्थित नेपाली दूतावासले कुवेत र इराकमा रहेका नेपालीहरूका लागि सातबुँदे आग्रह गरेको छ । आइतबार एक सूचना जारी गर्दै दूतावासले यस्तो आग्रह गरेको हो ।
दूतावासले कुवेत तथा इराकको आधिकारिक निकायहरूबाट प्रेषित हुने समाचार, निर्देशन एवं सूचना पालना गर्न र अफवाहको पछि नलाग्न आग्रह गरेको छ ।
“अफवाहपूर्ण सूचना सामग्रीहरू सामाजिक सञ्जालमा साझा नगर्नुहुन,” दूतावासले जारी गरेको सूचनामा भनिएको छ । “सरकारले प्रतिबन्ध लगाएका कार्यहरू” नगर्न पनि आग्रह गरिएको छ ।
दूतावासले आकाशमा देखिने कुनै पनि हवाई आक्रमण तथा प्रतिरक्षाका घटनाहरू तथा घटनास्थलको तस्बिर तथा भिडियो नखिच्न तथा सामाजिक सञ्जालमा साझा नगर्न कुवेत सरकारले प्रकाशित गरेको सूचना पूर्ण रुपमा पालना गर्न पनि आग्रह गरेको छ ।
त्यस्तै, कुनै अपरिचित वा शंकास्पद वस्तु नजिक नजान दूतावासले अपिल गरेको छ । “साइरन बजेको बेला घर/कार्यस्थल बाहिर भएको अवस्थामा नजिकैको भवनभित्र बस्नु हुन तथा भवनभित्रै भएको अवस्थामा सुरक्षितसाथ भवनभित्रै बसिदिनुहुन तर सिसा/झ्याल/बार्दली छेउछाउ नबसिदिनुहुन” दूतावासले सूचनामा आग्रह गरेको छ ।
