अमेरिकामा रहेका व्यवसायी पासाङ लामाले बाढी प्रभावितहरूको राहत तथा उद्धारका लागि प्रधानमन्त्री दैवीप्रकोप उद्धार कोषमा १ करोड ७ हजार रुपैयाँ सहयोग गरेका छन्। व्यवसायी लामाले लामा फाउन्डेसनको तर्फबाट उक्त रकम सहयोग गरेका हुन्। प्रधानमन्त्री दैवीप्रकोप उद्धार कोष नै सुरक्षित रहेको भन्दै आफूले यसै कोषमा रकम पठाएको लामाले आफ्नो फेसबुकमार्फत जानकारी दिएका छन्।लामाले अरूलाई पनि यही कोषमार्फत सहयोग गर्न आग्रह गरेका छन्। ३० वर्षदेखि अमेरिकामा रहेका लामाको अमेरिकामा स्टेसन होलसेल किराना पसल लगायतका व्यवसाय छन्।
त्यसैगरी नेपाली समाज टेक्ससले एकलाख डलर नेपाल सरकारलाई पठाउने लक्ष्य लिएर आफ्ना सदस्यहरु तथा सहयोगी दाताहरुलाई आव्हान गरिरहेको छ । अध्यक्ष विजय भुसालले विगतका केही घटनाहरुमा अन्य संस्थाहरुले रकम दुरुपयोग गरेको विषयलाई लिएर समाजमा वदनाम गर्न खोजिएको प्रति गुनासो गर्दै नेपाली समाज टेक्ससले संकलित रकम प्रधानमन्त्री दैवी प्रकोप राहत कोषमा जम्मा गर्ने बताए हामी एकलाख डलर संकलन गरेर पठाउने लक्ष्यका साथ काम गरिरहेका छौँ अध्यक्ष भुसालले भने । स्थानीय व्यबसायीदेखि लिएर रोजगारीमा संलग्नहरुले धमाधम सिधै सरकारी खातामा सहयोग पठाइरहेका छन् । गैर आवासीय नेपाली संघ टेक्सस च्याप्टरका पुर्ब अध्यक्ष एवं व्यबसायी राजेश अर्यालले सरकारी कोषमा १५ लाख पठाएका छन् ।
