नेपाली कवि तथा लेखक रञ्जना निरौलालाई उहाँको कविता ‘सिटी लाइट्स’का लागि इटालीको प्रतिष्ठित ‘इल मेलेतो दि गुइडो गोजानो’ साहित्य पुरस्कारअन्तर्गत ‘र्ग्यान्ड जुरी प्राइस’ प्रदान गरिएको छ ।
मार्च २०२६ मा घोषित अन्तर्राष्ट्रिय कविता प्रतियोगितामा प्राप्त रचनामध्येबाट ‘सिटी लाइट्स’ छनोट भएको हो । विभिन्न देशका लेखक, कवि, अनुवादक, सम्पादक तथा कलाकार सम्मिलित अन्तर्राष्ट्रिय जुरीले मूल्यांकन गरी पुरस्कारका लागि निरौलाको कविता छनोट गरेको जनाइएको छ ।
पुरस्कार निर्णायक समितिमा ओमानकी अमिता संघवी, बेलायतकी दाना नेरी, ग्रीसकी जान्थी होन्द्रो-हिल, फ्रान्सका मार्को पेर्ना र अर्जेन्टिनाकी अलेहान्द्रा मिरान्डा रहनुभएको थियो । जुरीको संयोजन लिलिता कोनरियरी र लिडिया कियारेलीले गर्नुभएको थियो ।
निरौलाले पुरस्कारलाई नेपाली भाषा तथा साहित्यलाई अन्तर्राष्ट्रिय साहित्यिक समुदायसँग जोड्ने महत्त्वपूर्ण अवसरका रूपमा लिँदै यसले आफ्नो साहित्यिक यात्रामा थप प्रेरणा र जिम्मेवारी थपेको बताउनुभएको छ ।
