अमेरिकी विदेशमन्त्री मार्को रुबियोले नेपालको संविधान दिवसका अवसरमा अमेरिकी सरकार र जनताका तर्फबाट नेपाली जनतालाई शुभकामना व्यक्त गर्नुभएको छ।अमेरिकी विदेश मन्त्रालयले जारी गरेको वक्तव्यमा विदेशमन्त्री रुबियोले नेपालमा हालै आएको विनाशकारी आकस्मिक बाढीबाट ज्यान गुमाएकाहरूप्रति दुःख व्यक्त गर्दै घाइते तथा प्रभावित परिवारप्रति समवेदना प्रकट गर्नुभएको छ।
बाढीमा प्रभावित अमेरिकी नागरिकको अवस्थाप्रति पनि रुबियोले चिन्ता व्यक्त गर्नुभएको छ। विपद्को करिब तीन सातापछि पनि नेपाल–चीन सीमा क्षेत्रमा करिब ७० जना अमेरिकी नागरिक सम्पर्कविहीन रहेको अमेरिकी विदेश मन्त्रालयले जनाएको छ। मन्त्रालयका अनुसार १८ जना अमेरिकी नागरिक भने सुरक्षित स्थानमा पुगिसकेका छन्।
नेपालमा जारी उद्धार तथा राहत कार्यमा अमेरिकाले पूर्ण सहयोग र समर्थन जारी राख्ने प्रतिबद्धता पनि वक्तव्यमा व्यक्त गरिएको छ।
नेपाल र अमेरिकाबीच करिब ८० वर्षदेखि कायम रहेको द्विपक्षीय सम्बन्धलाई स्मरण गर्दै विदेशमन्त्री रुबियोले आगामी दिनमा व्यापार, नवप्रवर्तन र लगानीका क्षेत्रमा सहकार्य विस्तार गर्न अमेरिका इच्छुक रहेको बताउनुभएको छ। दुवै देशका जनताको हितका लागि नेपाल–अमेरिका साझेदारीलाई अझ सुदृढ बनाउन अमेरिका प्रतिबद्ध रहेको पनि वक्तव्यमा उल्लेख गरिएको छ।
