अमेरिकी विदेश मन्त्रालयकी राजनीतिक मामिलासम्बन्धी उपविदेशमन्त्री एलिसन हुकरले न्यूयोर्कमा नेपालका परराष्ट्रमन्त्री शिशिर खनालसँग भेटवार्ता गर्नुभएको छ।
भेटका क्रममा उपविदेशमन्त्री हुकरले नेपालमा आएको विनाशकारी बाढीबाट प्रभावित सबैप्रति संयुक्त राज्य अमेरिकाको हार्दिक सहानुभूति व्यक्त गर्दै उहाँले बाढीपछि अझै सम्पर्कविहीन रहेका करिब ७० जना अमेरिकी नागरिकका परिवारप्रति समेत समवेदना व्यक्त गर्नुभयो।
भेटवार्ताका क्रममा उपविदेशमन्त्री हुकरले नेपालमा स्थायी तथा आवश्यकताअनुसार निर्माण गरिने पुलहरूका लागि १ करोड अमेरिकी डलर सहयोग गर्ने योजना घोषणा गर्नुभयो। यी पुलहरू एक अमेरिकी कम्पनीबाट खरिद गरिनेछन्।
यी पुलहरूले बाढी प्रभावित क्षेत्रमा क्षतिग्रस्त महत्वपूर्ण यातायात पूर्वाधार पुनःस्थापना गर्नुका साथै क्षेत्रीय सम्पर्क र आवागमनलाई थप मजबुत बनाउने अपेक्षा गरिएको अमेरिकी दुतावासद्धारा जारी विज्ञप्तिमा उल्लेख छ ।
उपविदेशमन्त्री हुकरले प्रभावित समुदायका लागि खानेपानी, सरसफाइ तथा स्वच्छता, साथै आश्रय, संरक्षण, जीविकोपार्जन र जाडोयामका लागि आवश्यक सहयोग उपलब्ध गराउन थप ८० लाख अमेरिकी डलर सहायता प्रदान गर्ने योजना पनि घोषणा गर्नुभयो।
त्यस्तै, अमेरिकी विदेश मन्त्रालयले विपद् प्रतिकार्यमा सहयोग पुर्याउने उद्देश्यले अमेरिकामा निर्मित ड्रोन खरिदका लागि १ करोड ३० लाख अमेरिकी डलर उपलब्ध गराउने योजना बनाएको छ।
यस घोषणासँगै नेपालमा बाढीको प्रतिकार्य तथा पुनःस्थापनाका लागि संयुक्त राज्य अमेरिकाले प्रदान गर्ने कुल सहायता ३ करोड ६० लाख अमेरिकी डलरभन्दा बढी पुगेको छ।
संयुक्त राज्य अमेरिकाले नेपाल सरकारसँग नजिकबाट सहकार्य गर्दै सबैभन्दा बढी आवश्यकता रहेका क्षेत्रमा थप सहायता पहिचान तथा उपलब्ध गराउने कार्यलाई निरन्तरता दिने जनाएको छ।
