दुई अफ्रिकी देश रुवान्डा र प्रजातान्त्रिक गणतन्त्र कङ्गोले फेरि अमेरिकामा सहमति कायम गर्दै दशकौँदेखिको द्वन्द्व अन्त्य गरेका छन्। शुक्रबार दुई देशबीच अमेरिकामा भएको वार्तामा सहमति भएपछि दुवै देशसँग अमेरिकाले खनिज सम्झौता गर्ने सम्भावना प्रबल भएको छ। यस सहमतिले प्रजातान्त्रिक गणतन्त्र कङ्गोमा वर्षौँदेखि भएको सैन्य गतिविधिको अन्त्य गर्दै शान्ति स्थापना गर्न सहयोग पुग्ने छ। ‘आज हिंसा र विध्वंसको अन्त्य भएको छ। यस पुरै क्षेत्रमा आशा र अवसरको नयाँ अध्याय सुरु भएको छ,’ अमेरिकी राष्ट्रपति डोनाल्ड ट्रम्पले भने।
अमेरिकी उपराष्ट्रपति जेडी भान्स र विदेशमन्त्री मार्क रुबियोसहित रुवान्डा र प्रजातान्त्रिक कङ्गोका अधिकारीको उपस्थितिमा सहमति भएको हो।
अफ्रिकन अधिकारीले हस्ताक्षर गरिसकेपछि सोही सहमतिमा हस्ताक्षर गर्दै ट्रम्पले यसलाई जर्बजस्त सफलताको रूपमा व्याख्या गरे। सहमतिमा तीन देशका विदेश मन्त्रीको हस्ताक्षर छ।
कङ्गोको राष्ट्रपति कार्यालयले शुक्रबार विज्ञप्ति जारी गर्दै यसलाई ३० वर्ष यताकै कूटनीतिक सफलताको रूपमा व्याख्या गरिएको छ। यो सहमति पछि डिआर कङ्गोका राष्ट्रपति फेलिक्स तिस्केदी र रुवान्डाका राष्ट्रपति पाउल कागामे चाँडो नै अमेरिका जाने भएका छन्। यी दुई राष्ट्रपति सायद एकै पटक अमेरिका जान सक्ने छन्।
यी दुई देशबीच मध्यस्थ गर्न कतारले ठुलो भूमिका निर्वाह गरेको थियो। यस वर्षको सुरुवातमा नै कतारले पहल गरेपछि उसैले अमेरिकासँग पनि सम्पर्क गराएको हो।
डिआर कङ्गोका थुप्रै महत्त्वपूर्ण सहर एम २३ विद्रोहीले कब्जा गरेपछि डिआर कङ्गोमा वर्षौँदेखिको हिंसा यस वर्ष अझ बढेको थियो। विद्रोहीले प्रान्तीय राजधानी गोमा सहितको स्थान कब्जा गर्ने क्रममा हजारौँको ज्यान गएको थियो सयौँ हजारौँ विस्थापित भएका थिए।
