अमेरिकी राष्ट्रपति डोनाल्ड ट्रम्पले इजरायलले गाजामा ६० दिनको युद्धविराम अन्तिम रूप दिन आवश्यक “सबै सर्तहरू“ मा सहमति जनाइसकेको बताएका छन् । प्रस्तावित सम्झौताको अवधिमा “हामी सबै पक्षसँग मिलेर युद्ध अन्त्य गर्ने प्रयास गर्नेछौं,“ ट्रम्पले आफ्नो सोसल मिडिया ट्रुथ सोशलमा लेखेका छन् । कस्ता सर्त भन्ने विषयमा खुलासा भने गरेका छैनन् ।
राष्ट्रटपति ट्रम्पले भनेका छन “कतारी र इजिप्टेलीहरूले, शान्ति ल्याउन धेरै मेहनत गरेका छन्, यो अन्तिम प्रस्ताव अघि ल्याउनेछन् । म आशा गर्छु… कि हमासले यो सम्झौता स्वीकार गर्छ, किनभने अबभन्दा राम्रो मौका आउँदैन यदि यो मौका गुम्यो भने स्थिति झन् बिग्रिने मात्र छ ।“
इजरायलले गाजामा सैनिक कारबाही ७ अक्टोबर २०२३ मा हमासको आक्रमणपछि सुरु गरेको थियो, जसमा करिब १ हजार २०० जना इजरायली मारिएका थिए । त्यसयता, हमास–शासित गाजाको स्वास्थ्य मन्त्रालयका अनुसार, कम्तीमा ५६ हजार ६४७ जना गाजाली मारिएका छन् । गाजामा प्रस्तावित युद्धविरामका सर्तहरू हमासले स्वीकार गर्ने कि नगर्ने भन्ने कुरा अहिले तत्काल प्रस्ट छैन ।
राष्ट्रपति डोनाल्ड ट्रम्पको घोषणाअघि आगामी हप्ता हुने इजरायली प्रधानमन्त्री बेन्जामिन नेतन्याहु सँग अमेरिकामा भेटवार्ता तय गरिएको छ, जसमा ट्रम्पले आफू “एकदम कडा रूपमा प्रस्तुत हुने“ बताएका छन् । मंगलबार, ट्रम्पले आफूलाई विश्वास छ कि नेतन्याहु गाजामा द्वन्द्व अन्त्य गर्न चाहन्छन्, भनेका छन् । त्यही दिन, इजरायलका रणनीतिक मामिलामन्त्री रोन डर्मर अमेरिकी मध्यपूर्व विशेष दूत स्टिभ विटकाफ, विदेशमन्त्री मार्को रुबियो, र उपराष्ट्रपति जेडी भ्यान्ससँग वाशिङ्टनमा भेट गर्ने तय भएको थियो ।
गत साता, हमासका एक वरिष्ठ अधिकारीले बताएका थिए कि मध्यस्थकर्ताहरू युद्धविराम र बन्धक मुक्तिको नयाँ सम्झौता गराउन थप प्रयासरत रहेको बताएका थिए । उता इजरायलले भनेको छ कि “जबसम्म हमास पूर्ण रूपमा समाप्त हुँदैन, द्वन्द्व अन्त्य हुन सक्दैन ।“ विपरीतमा, हमासले स्थायी युद्धविराम र गाजाबाट पूर्ण इजरायली फौजी फिर्ताको माग गर्दै आएको छ । अझै करिब ५० जना इजरायली बन्धकहरू गाजामा छन्, जसमध्ये कम्तीमा २० जना जिवित रहेको विश्वास गरिएको छ ।
