दक्षिणी गाजामा रहेको एक अस्पतालमा सोमबार इजरायली हमला हुँदा पाँच पत्रकारसहित कम्तीमा २० जनाको मृत्यु भएको नागरिक सुरक्षा निकायले जनाएको छ ।
‘दक्षिणमा रहेको खान युनिसस्थित नासिर अस्पतालमा भएको हमलामा परी पाँच पत्रकार र नागरिक सुरक्षाका एक सदस्यसहित हालसम्म २० जनाको मृत्यु भएको छ,’ गाजास्थित नागरिक सुरक्षा निकायका प्रवक्ता महमुद बसालले भने । मिडिया अनुगमनकारी संस्थाका अनुसार इजरायल र हमासबीच २२ महिनादेखि चलिरहेको युद्धमा परी १ सय ९० भन्दा बढी पत्रकार मारिइसकेका छन् ।
कतारस्थित टीभी नेटवर्क अलजजिराका प्रवक्ताले सोमबार आफ्ना एक फोटो पत्रकार तथा क्यामेरापर्सन मोहम्मद सलामाको उक्त हमलामा परी मृत्यु भएको बताएका छन् । ‘अलजजिरा मिडिया नेटवर्कले यस भयानक अपराधको कडा शब्दमा भर्त्सना गर्दछ । सेनाले सत्यलाई चुप गराउने योजनाबद्ध अभियानको एक भागका रूपमा पत्रकारहरूलाई प्रत्यक्ष रूपमा निसाना बनाएको छ र हत्या गरेको छ,’ अलजजिराले भनेको छ ।
पहिलो हमलापछि धूवाँ उडिरहेको फुटेजमा देखिएको थियो । भिडियोमा एक चिकित्सकले पत्रकारहरूलाई देखाउन रगतले लतपतिएको लुगा उठाइरहेका बेला अर्को हमला भएको थियो । उक्त हमलामा आफ्ना सहकर्मी हुसाम अल–मसरीको ज्यान गएको रोयटर्सले पुष्टि गरेको छ । उनी एक भवनको छतबाट टीभीमा प्रत्यक्ष प्रसारण गरिरहेका थिए, जुन पहिलो हमलालगत्तै बन्द भएको थियो । प्रत्यक्षदर्शीका अनुसार, उद्धारकर्मी र पत्रकारहरू पहिलो हमलाको स्थलमा पुगेपछि दोस्रो हमला भएको थियो । रोयटर्सका प्रवक्ताले सहकर्मीको निधनले मर्माहत भएको उल्लेख गर्दै सोही हमलामा परी रोयटर्सकै हातेम खालिद घाइते भएको बताए । ‘हामीले तत्काल थप जानकारी मागिरहेका छौं, गाजा र इजरायलका अधिकारीहरूलाई हातेमका लागि तत्काल चिकित्सा सहायता प्रदान गर्न आग्रह गरेका छौं,’ रोयटर्सका प्रवक्ताले जारी गरेको विज्ञप्तिमा भनिएको छ ।
अमेरिकी समाचार संस्था एसोसिएटेड प्रेस (एपी) ले पनि एक विज्ञप्ति जारी गर्दै ३३ वर्षीया फोटो पत्रकार मरियम डग्गाको मृत्युको खबरले स्तब्ध र दुःखी बनाएको जनाएको छ । यसअघि एक विज्ञप्ति जारी गर्दै डग्गाको हत्या हुँदा उनी एजेन्सीमा कुनै पनि जिम्मेवारीमा नभएको उल्लेख गरिएको थियो ।
दुई साताअघि पनि इजरायली सेनाले गाजा सहरको अल–सिफा अस्पताल नजिकै गरेको हमलामा परी अलजजिराका चार जनासहित ६ पत्रकार मारिएका थिए । संयुक्त राष्ट्रसंघको मानवअधिकार कार्यालयले पत्रकारको ज्यान जाने गरी भएका निरन्तरका हमलाको निन्दा गर्दै यसलाई अन्तर्राष्ट्रिय कानुनको गम्भीर उल्लंघन भनेको छ । तर इजरायल रक्षा बल (आईडीएफ) ले भने हमलामा मारिएका अलजजिराका रिपोर्टर अनस अल–सरिफ हमासमा आतंकवादी सेलको प्रमुखका रूपमा काम गरेको दाबी गर्दै आएको छ । तर उक्त दाबीलाई इजरायलले हालसम्म पुष्टि गर्न भने सकेको छैन ।
