सरकारले साउदी अरबसँग श्रम सम्झौतामा हस्ताक्षर गर्न श्रम, रोजगार तथा साामजिक सुरक्षा मन्त्रालयलाई अनुमति दिएको छ । मन्त्रिपरिषद्को शुक्रबार बसेको बैठकले साउदीसँग गर्ने श्रम सम्झौतालाई पारित गरेको हो । श्रम, रोजगार तथा सामाजिक सुरक्षा मन्त्रालयले साउदीसँग चरणबद्ध रूपमा वार्ता गरी श्रम सम्झौताको मस्यौदा तयार गरी स्वीकृतिका लागि मन्त्रिपरिषद्मा पठाएको थियो । श्रम मन्त्रालयले घरेलु श्रमिकको सम्झौतालाई थाती राखेर सामान्य र सीपयुक्त श्रमिकको सीप प्रमाणीकरण कार्यक्रमसम्बन्धी सम्झौता गर्ने भएको हो ।
नेपाल सरकारले साउदी अरबसँग श्रमिकको अधिकार, न्यूनतम तलब, चर्को लागत शुल्कको अन्त्य र शव छिटो स्वदेश पठाउने विषय समेटिएको श्रम सम्झौता गर्न अनुमति दिएको छ। सम्झौतामा घरेलु श्रमिकसम्बन्धी विषयलाई थाती राखेर सामान्य र सीपयुक्त श्रमिकको सीप प्रमाणीकरण कार्यक्रमलाई प्राथमिकता दिइएको छ। साउदीमा कार्यरत नेपाली श्रमिकको अधिकार र सुरक्षामा सुधार गर्न अन्तर्राष्ट्रिय दबाब बढिरहेका बेला दुवै देशले श्रमिकको हितमा नयाँ व्यवस्था लागू गर्ने तयारी गरेका छन्।
गत जेठको अन्तिम सातामा जेनेभामा श्रम, रोजगार तथा सामाजिक सुरक्षा मन्त्री शरतसिंह भण्डारी र साउदी अरबका अन्तर्राष्ट्रिय मामिलाका उपमन्त्री तारिक अल हमदबीच घरेलु श्रमिकसँग सम्बन्धित सम्झौतालाई बाँकी राखेर सामान्य सम्झौता गर्ने सहमति भएको थियो । साउदीसँग घरेलु श्रमिकसम्बन्धी सम्झौतामा थप गृहकार्य गरिने भएको छ । दुई देशबीच अन्तर्राष्ट्रिय श्रम संगठन (आईएलओ)को मापदण्डअनुसार श्रमिकको अधिकार, व्यवसायजन्य स्वास्थ्य सुरक्षा, रोजगारदाता परिवर्तन, श्रमिकको न्यायोचित भर्ना गर्ने विषयहरू समावेश गरिएको छ ।
