अन्तर्राष्ट्रिय सञ्चारमाध्यम बीबीसीले १८ सयदेखि २ हजार रोजगारी कटौती गर्ने भएको छ । आफ्नो आर्थिक दबाबलाई कम गर्न झन्डै १० प्रतिशत कर्मचारी कटौती गरिने बीबीसीले जनाएको हो । बीबीसीका अन्तरिम महानिर्देशक टाल्फान डेभिसले सबै च्यानल वा सेवा बन्द हुनसक्ने संभावना पनि कायमै रहेको बताएका छन् ।
‘हामीले सबै कुरा हेर्न जरुरी छ । हामीले आगामी दुई वर्षभित्र ५० करोड पाउन्ड हाराहारीमा रकम जोगाउनुपर्ने छ । यसका लागि केही ठूला र कठिन निर्णय हुनेछन् । तर, सबै कदम गम्भीरतापूर्वक चाल्नेछौं,’ रेडियो फोरको बीबीसी मिडिया शोसँग उनले भने । ‘जागिर कटौती कर्मचारीहरूको लागि साँच्चै कठिन खबर हुनेछ,’ उनले भने ।
बेलायतको प्रशारण संघकी प्रमुख फिलिप्पा चाइल्ड्सले “यति ठूलो मात्रामा कर्मचारी कटौती बीबीसीका लागि विनाशकारी हुने चेतावनी दिइन् । बीबीसीमा अहिले झन्डै २१,५०० पूर्ण–कालीन कर्मचारीहरु छन् ।
बुधबार कर्मचारीहरुलाई पठाएको इमेलमा निमित्त महानिर्देशक टल्फानले कम्पनीले उल्लेखनीय आर्थिक दबाब झेलिरहेको जनाएका छन् ।
‘हाम्रो लागत र हाम्रो आम्दानी बीचको खाडल बढ्दै गइरहेको छ । यसका धेरै कारणहरु छन् । मुद्रास्फीति धेरै उच्च छ । हाम्रो इजाजतपत्र शुल्क र व्यावसायिक आम्दानी दबाबमा छ र विश्वव्यापी अर्थतन्त्र अशान्त छ,’ इमेलमा लेखिएको छ । प्रशारक संघकी प्रमुख चाइल्ड्सले समाचार उद्योग केही बहुराष्ट्रिय निगमहरूको हातमा केन्द्रित हुँदै गएको समयमा बीबीसीलाई अझै सुदृढ बनाउनुपर्ने आवश्यकता रहेको बताइन् ।
‘बेलायतलाई पहिलेभन्दा बढी आत्मविश्वासी, महत्वाकांक्षी र दिगो रूपमा वित्त पोषित बीबीसी आवश्यकता छ ,’ उनले भनिन् । उनले बीबीसीको कोषलाई अझै सुरक्षित र बलियो बनाउनका लागि सरकारले नीतिहरु ल्याउनुपर्ने बताइन् ।
