फिलिपिन्सको मिन्डानाओ टापुनजिक समुद्रमा ७.८ म्याग्निच्युडको शक्तिशाली भूकम्प गएको छ । भूकम्पपछि एसियाका धेरै देशहरूमा सुनामीको चेतावनी जारी गरिएको छ । संयुक्त राज्य अमेरिकाको युनाइटेड स्टेट जियोलोजिकल सर्वेका अनुसार स्थानीय समय बिहान करिब ७ बजेर ४० मिनेटमा भूकम्प गएको हो । प्यासिफिक सुनामी वार्निङ सेन्टरले फिलिपिन्सका तटीय क्षेत्रमा ३ मिटर उचाइसम्मका सुनामीका छालहरू आउन सक्ने जनाएको छ ।
साथै इन्डोनेशिया र मलेसियाका केही भागमा १ मिटर उचाइसम्मका छालहरू पुग्न सक्ने सम्भावना रहेको बताइएको छ । अमेरिकाको नेशनल सुनामी वार्निङ सेन्टरले प्रारम्भिक ८.२ म्याग्निच्युडको अनुमानलाई घटाएर ७.८ म्याग्निच्युड कायम गर्दै अमेरिकाका तटीय क्षेत्रहरूमा कुनै खतरा नरहेको जनाएको छ ।
इन्डोनेसिया, फिलिपिन्स र जापानका अधिकारीहरूले सम्भावित खतरनाक छालबारे चेतावनी जारी गर्दै तटीय क्षेत्रमा बसोबास गर्ने नागरिकहरूलाई सुरक्षित स्थानमा जान आग्रह गरेका छन् । फिलिपिन्सका साराङ्गानी, दाभाओ अक्सिडेन्टल, तावी-तावी र सुलु लगायत नौ प्रान्तका तटीय बासिन्दाहरूलाई तुरुन्तै उच्च भूभाग वा भित्री क्षेत्रमा सर्न निर्देशन दिएको छ ।
