प्रधानमन्त्री बालेन शाह संयुक्त राष्ट्रसंघको महासभामा भाग लिन जाने भएका छन् । अमेरिकाको न्युयोर्कमा हुन लागेको संयुक्त राष्ट्रसंघको ७९ औं महासभामा भाग लिनका लागि प्रधानमन्त्री शाह जान लागेको परराष्ट्र मन्त्रालय स्रोतले जनाएको छ । परराष्ट्रश्रोतका अनुसार पहिले परराष्ट्र मन्त्रि शिशिर खनाललाई पठाउने तयारी भए पनि भोटेकोशी बाढी पछि चौतर्फी दबाब बढेपछि प्रधानमन्त्रि पनि सहभागी हुन लागेका हुन । उनीसँगै परराष्ट्रमन्त्री शिशिर खनाल पनि सँगै जानेछन् ।
‘जाने तयारी भएपछि हामीले तयारी थालेका छौं मन्त्रालयले गर्नुपर्ने तयारी अघि बढाएको छ,’ मन्त्रालय स्रोतले भन्यो । महासभामा के विषय उठाउने भन्नेबारे प्रधानमन्त्री तथा मन्त्रिपरिषद् कार्यालयबाट पनि चासो व्यक्त भएको परराष्ट्र स्रोतले बतायो । प्रधानमन्त्री शाहको भ्रमणबारे औपचारिक निर्णय भने हुन बाँकी छ । यसअघि गत ३ भदौमा बसेको मन्त्रिपरिषद् बैठकले परराष्ट्रमन्त्री खनालको नेतृत्वको प्रतिनिधिमण्डललाई महासभामा सहभागी हुनका लागि स्वीकृति दिएको थियो ।
पछिल्लोपटक रसुवाको भोटेकोशीमा आएको बाढीपछिको अवस्थालाई मध्यनजर गर्दै प्रधानमन्त्री शाह पनि सभामा सहभागी हुन जान लागेको स्रोतको भनाइ छ । प्रधानमन्त्री शाह आफैं उपस्थित भएर उक्त सभामा जलवायुको विषय उठाउन पर्ने माग पछिल्लो समय बढेको थियो । जलवायु संकटकै कारणले नेपालले ठूलो क्षति व्यहोरेको पृष्ठभूमिमा यो सभालाई प्रयोग गरेर नेपालले आफूमाथि न्याय माग्नपर्ने माग उठ्दै आएको छ ।
