अमेरिकी राष्ट्रपति डोनाल्ड ट्रम्पको एजेन्डा अघि बढाउने प्रतिबद्धता जनाउँदै नयाँ प्रेस सेक्रेटरी क्याटी जाकारियाले ह्वाइट हाउसमा आफ्नो पहिलो औपचारिक पत्रकार सम्मेलन सुरु गरिन । न्युज म्याक्रीकी पूर्व टिप्पणीकार जाकारियाले आफ्नो पहिलो ब्रिफिङका क्रममा अधिकांश समय तयार पारिएको स्क्रिप्ट हेरेर बोलेकी थिइन्। राष्ट्रपति ट्रम्पले जाकारियाको पहिलो सार्वजनिक ब्रिफिङलाई ‘उत्कृष्ट’ भन्दै प्रशंसा गरेका छन्। ट्रम्पले सञ्चारमाध्यमसँग प्रत्यक्ष संवाद गर्दा प्रायः कडा भाषा प्रयोग गर्ने र आफ्ना आलोचक पत्रकारहरूप्रति आक्रामक शैली अपनाउने गरेका कारण ह्वाइट हाउसको प्रेस सेक्रेटरी पदलाई चुनौतीपूर्ण जिम्मेवारीका रूपमा हेरिन्छ।
जाकारियाले भने ट्रम्प प्रशासनको एजेन्डालाई अघि बढाउने र सरकारका नीति तथा उपलब्धिबारे अमेरिकी जनतालाई जानकारी गराउने आफ्नो प्राथमिकता रहेको बताएकी छन्। उनको पहिलो ब्रिफिङमा प्रश्न सोध्ने अवसर पाएका सञ्चारमाध्यममा ‘ब्रेटबार्ट’, ‘फक्स न्युज’ र ‘डेली मेल’ लगायत थिए। आलोचनात्मक प्रश्न र पत्रकारहरूसँगको प्रत्यक्ष संवादका लागि महत्त्वपूर्ण मानिने प्रेस ब्रिफिङमा सीमित प्रश्नलाई मात्र अवसर दिइएको विषयले उनको सञ्चार शैलीबारे चासो बढाएको छ।
यसअघि ट्रम्प प्रशासनकी प्रेस सेक्रेटरी रहेकी क्यारोलिन लेभिटले १७ महिनाको कार्यकालपछि गत अगस्टमा पद छाडेकी थिइन्। जाकारियाले आफ्नो पहिलो ब्रिफिङमा लेभिटकै शैलीमा ट्रम्प प्रशासनका नीतिहरू, अर्थतन्त्रको विकास र ऊर्जा उत्पादनसम्बन्धी उपलब्धिहरूको प्रशंसा गर्न जोड दिएकी छन्।ब्रिफिङका क्रममा जाकारियाले अमेरिकाकी ग्रीसका लागि राजदूत किम्बर्ली गुइफोसँग ह्वाइट हाउसले राजीनामा मागेको र उनले राजीनामा दिएको जानकारी पनि सार्वजनिक गरिन्।
ह्वाइट हाउसको प्रेस सेक्रेटरीले राष्ट्रपतिको नीति र निर्णयबारे जानकारी दिने मात्र नभई पत्रकारका प्रश्नको जवाफ दिने तथा सरकार र सञ्चारमाध्यमबीच संवाद कायम गर्ने जिम्मेवारीसमेत निर्वाह गर्नुपर्ने हुन्छ। त्यसैले जाकारियाको आगामी कार्यशैलीलाई उनको पहिलो ब्रिफिङभन्दा व्यापक रूपमा मूल्याङ्कन गरिनेछ।
