अमेरिकाको हाउस अफ रिप्रेजेन्टेटिभ्समा यूक्रेनको सहयोगका लागि ६१ अर्ब डलरको राहत प्याकेजसम्बन्धी प्रस्ताव पारित भएको छ।
बीबीसीका अनुसार यूक्रेनको मद्दतसँग सम्बन्धित उक्त प्रस्तावको पक्षमा ३११ मत खसे भने ११२ मत विपक्षमा खसे।
पारित भएको उक्त प्रस्ताव अब अमेरिकी सीनेटमा लगिने छ। आगामी केही दिनमा सिनेटबाट पनि उक्त प्रस्ताव पारित हुने अपेक्षा गरिएको छ।
सीनेटबाट पारित भएपछि अमेरिकी राष्ट्रपति जो बाइडनले हस्ताक्षर गर्दै त्यसलाई कानूनी मान्यता दिनेछन्।
उक्त प्रस्तावमा इजराइललाई पनि झन्डै २६ बिलियन डलरको सैन्य सहयोग दिइएको छ।
अमेरिकाको प्रतिनिधि सभाले युक्रेनलाई ६० अर्ब डलरभन्दा बढी सहायता दिने विधेयक शनिबार पास गर्यो। योसँगै रूससँगको युद्धमा हतियारको अभाव खेपिरहेको युक्रेनलाई राहत भएको छ।
सदनको स्पष्ट बहुमत लामो समयदेखि युक्रेनलाई सहायता दिन तयार थियो। तैपनि रिपब्लिकन पार्टीका राष्ट्रपतीय उम्मेदवार डोनाल्ड ट्रम्पले सभामुख बनाएका माइक जोनसनले यो सहायता रोकिरहेका थिए।
शनिबार भने अन्ततः जोनसनले आफ्नो पद नै दाउमा राखेर सो विधेयक सदनमा निर्णयार्थ प्रस्तुत गरे। बहुमत रिपब्लिकन सांसदले विपक्षमा भोट हाले पनि डेमोक्रयाट्सको समर्थनमा सो विधेयक पास भयो।
डेमोक्रयाटिक पार्टीको बहुमत रहेको सिनेटबाट यो पास भएर राष्ट्रपति जो बाइडेनले हस्ताक्षर गरेपछि युक्रेनलाई अमेरिकी सहायता फेरि सुरु हुनेछ।
विधेयक पास हुनेबित्तिकै युक्रेनी राष्ट्रपति भ्लोदोमिर जेलेन्सकीले दुवै दललाई र व्यक्तिगत रूपमा सभामुख माइक जोनसनलाई धन्यवाद दिए। उता रूसले भने यसले द्वन्द्वमा अझ धेरै विध्वंश हुने र थप मान्छे मारिने बताएको छ।
द गार्डियनका अनुसार अमेरिकाले दिने ६०.७ अर्ब डलरमध्ये २३ अर्ब डलरबाट अमेरिकाले युक्रेनलाई हतियार दिएपछि कम भएको आफ्नो भण्डारमा फेरि हतियार थप्नेछ। त्यस्तै १४ अर्ब डलर बराबरको अत्याधुनिक हतियार अमेरिकी रक्षा मन्त्रालयले आफैं किनेर युक्रेनलाई दिनेछ। ११ अर्ब डलर जति युरोपमा अमेरिकी सेना र गुप्तचर परिचालन गर्न खर्च हुनेछ। लगभग ८ अर्ब डलर चाहिँ गैरसैनिक सहायतामा खर्च हुनेछ।
