राष्ट्रिय स्वतन्त्र पार्टीका वरिष्ठ नेता बालेन्द्र शाह बालेनको डेरामा चोरी गर्ने घटनामा संलग्न तीन जनालाई प्रहरीले पक्राउ गरेको छ। जिल्ला प्रहरी परिसर काठमाडौंका अनुसार पक्राउ पर्नेहरूमा काठमाडौं–१६ बालाजुका ४२ वर्षीय विष्णुबहादुर राजवाहक, सिन्धुपाल्चोक लिसंखुपाखर–६ का ४६ वर्षीय खिमबहादुर खड्का र डोटी दिपायल सिलगढी नगरपालिका–६ का ४५ वर्षीय सञ्जय श्रेष्ठ रहेका छन्। उनीहरूले चप्पल कारखानास्थित सितादेवी गुरुङको घरमा रहेको बालेनको डेरा कोठामा चोरी गरेका थिए।
प्रहरीका अनुसार यस समूहका मुख्य योजनाकार विष्णुबहादुर राजवाहक हुन्। उनलाई २३ माघमा बाँसबारीबाट पक्राउ गरिएको हो। राजवाहक यसअघि पनि विभिन्न अपराधमा संलग्न रहँदै आएका व्यक्ति हुन्। उनीविरुद्ध २०७२ सालमा साधारण अपराध र चोरीसम्बन्धी मुद्दा चलेको थियो। चोरीकै कसुरमा तीन वर्ष छ महिना कैद भुक्तान गरिरहेका राजवाहक २४ भदौमा जेन–जी आन्दोलनका क्रममा नख्खु कारागारबाट फरार भएका थिए। फरार भएपछि उनले कम्तीमा पाँच वटा चोरीमा संलग्न रहेको खुलेको प्रहरीले जनाएको छ।
राजवाहकले बालेनको डेरामा चोरी गरेको स्वीकार गरिसकेको प्रहरीले जनाएको छ। उनी काठमाडौं महानगरपालिका–२६ स्थित क्लासिक एण्ड लज इन गेस्ट हाउसको कोठा नम्बर ४०२ मा बस्दै आएका थिए। सोही कोठाबाट प्रहरीले वर्ल्डलिंक लेखिएको राउटर, दुई थान सीसी क्यामेरा, एक्रोन गोल्ड लेखिएको निलो बिँड भएको पिलास, सलाई रेन्ची, रेती, स्क्रु र कालो ज्याकेट बरामद गरेको छ।
दोस्रो अभियुक्त खिमबहादुर खड्कालाई २४ माघमा जडिबुटीबाट पक्राउ गरिएको हो। उनी बैंकिङ कसुरका फरार अभियुक्तसमेत रहेको खुलेको छ। कक्षा ८ सम्म अध्ययन गरेका खड्का बालुवा डिपो सञ्चालन गर्दै आएका थिए। प्रहरीले राजवाहकले चोरी गरेका सामानहरू खड्कामार्फत बिक्री गर्ने गरेको जनाएको छ। उनीहरूबीच करिब आठ वर्षअघिदेखि घर निर्माणसम्बन्धी कामका क्रममा चिनजान भएको पाइएको छ। खड्काको भक्तपुर ठिमी नगरपालिका–दुवाकोटस्थित घरबाट चाँदीका थाली, कचौरा, रिङ, नटबोल्ट तथा सुनजस्तै देखिने लक्ष्मीको मूर्ति, झुम्का, चन्द्रमा र सिक्रीजस्ता सामग्री बरामद गरिएको छ।
तेस्रो अभियुक्त सञ्जय श्रेष्ठलाई पनि २४ माघमै बालाजुबाट पक्राउ गरिएको हो। श्रेष्ठविरुद्ध २०६४ सालमा जबरजस्ती करणीको कसुरमा मुद्दा चलेको थियो। कक्षा १० सम्म अध्ययन गरेका श्रेष्ठ खेतीपाती गर्ने व्यक्ति हुन्। प्रहरीका अनुसार रामेछाप कारागारमा रहँदा श्रेष्ठ र राजवाहकबीच चिनजान भएको थियो। श्रेष्ठले चोरी गरिएका दुई ल्यापटप डिकमा राखी राजवाहकलाई आठ हजार रुपैयाँ दिएको खुलेको छ। धादिङ धुनीबेशी नगरपालिका–७ लप्सेस्थित उनको कोठाबाट झोला, डेलको ल्यापटप, म्याकबुक प्रो, चार्जर र डीभीआर बरामद गरिएको छ। प्रहरीले घटनासम्बन्धी थप अनुसन्धान जारी राखेको र पक्राउ परेकाहरूलाई आवश्यक कानुनी कारबाहीका लागि प्रक्रिया अगाडि बढाइएको जनाएको छ।
