भदौ २३ र २४ गते भएको जेनजी आन्दोलनका घटना जाँचबुझ गर्न गठित आयोगले फागुन २१ गतेको निर्वाचनपछि मात्रै प्रतिवेदन बुझाउने भएको छ। असोज ५ गते सरकारले तीन महिनाको समय दिँदै गठन गरेको पूर्वन्यायाधीश गौरीबहादुर कार्की नेतृत्वको आयोगको म्याद तेस्रो पटक थप गरिएको हो।
सोमबार बसेको मन्त्रिपरिषद् बैठकले आयोगको प्रस्ताव अनुसार फागुन २४ गतेसम्म (२५ दिन) म्याद थप गर्ने निर्णय गरेको सरकारका प्रवक्ता समेत रहेका गृहमन्त्री ओमप्रकाश अर्यालले बताए। सरकारले गठन गर्दा दिएको म्याद पुस ९ गते सकिएको थियो।
तर, सरकारले पहिलो पटक एक महिना थप गर्दै माघ ९ गतेसम्म बनाएको थियो। यो अवधिमा पनि काम नसकिएको भन्दै आयोगको प्रस्तावमा दोस्रो पटक २० दिन थप गरिएको थियो। दोस्रो पटक थप भएको म्याद माघ २८ गते सकिँदै थियो। त्यो म्याद सकिनु दुई दिनपहिले नै सरकारले अर्को २५ दिन थप गर्दै चुनावको तीन दिनपछिलाई धकेलेको हो।
