मुलुकमा बेथिति र चरम दुरुपयोगको विभिन्न नमुना घटनाहरु देखिने क्रममा नेपाल बैंक लिमिटेडबाट २० अर्ब हराएको भन्दै महालेखा र अख्तियार दुरुपयो अनुसन्धान आयोगमा उजुरी परेको छ । अख्तियार दुरुपयोग अनुसन्धान आयोगले पौने दुई अर्ब रुपैयाँको व्यावसायिक ऋण स्वीकृत गराउन भारतीय नागरिकलाई बिचौलियाका रूपमा प्रयोग गरेको भन्दै अध्यक्षसहित पाँच जनाविरुद्ध मुद्धा दायर भएको बेला २० अर्ब हराएको भन्दै अर्को उजुरी परेको हो । यद्यपि बैंकबाट हराएको २० अर्ब ४० करोड १५ लाख बढी रकम खोजी गर्न माग गर्दै बैंकका शेयरधनी अंगराज भारतीले महालेखापरीक्षकको कार्यालयमा उजुरी गरेका हुन ।
बैकबाट रकम हराएको भन्दै महालेखापरीक्षकको कार्यालयमा रकम खोजीका लागि उजुरी परेको हो । सोमबार मात्रै नेपाल बैंक लिमिटेडविरुद्ध ९ लाख रुपैयाँ घुस लिएको अभियोगमा अख्तियारले नेपाल बैंक लिमिटेडका तत्कालीन अध्यक्ष डा.चन्द्रबहादुर अधिकारीसहित पाँच जनाविरुद्ध भ्रष्टाचार मुद्दा दायर गरेको छ । तर महालेखा परीक्षकको कार्यालयमा बैंकका अध्यक्ष विरुद्ध २० अर्ब ४० करोड हराएको भन्दै खोजबिनका लागि उजुरी परेको थियो । सो उजुरी अख्तियार दुरुपयोग अनुसन्धान आयोगमा पनि परेको समाचार श्रोतको दावी छ ।
‘बैंकबाट साना तथा मझौला उद्योग कर्जा शिर्षकमा २०७४ चैत्र र २०७५ असारमा स्वीकृत कर्जाको रकम बैंकको सिस्टमबाट हराएको भन्दै हराएको रकम खोजी, दोषिलाई कारवाही गर्न माग गरिएको छ । अध्ययन गर्ने क्रममा नेपाल बैंकले उपलब्ध गराएका आर्थिक विवरणहरु अध्ययन गर्ने क्रममा बैंकले करीब २० अर्व ४० करोड १५ लाख कर्जा रकम गलत ऋणी देखाएर अपचलन गरेको देखियो’, उजुरीमा भनिएको छ ।
उनै भारतीले दिएको उजुरीमा २०७५ जेठको तुलनामा असारमा पनि त्यसैगरी रु ९ अर्व ९६ करोड ९१ लाख गायव भएको उल्ल्ेख छ । दुई वटै आर्थिक बर्षमा हराएको रकम जोड्दा २० अर्ब ४० करोड १५ लाख रुपैयाँ हराएको बताउँदै भारतीले उजुरी गरेका हुन् ।
