अमेरिकाको नेपाली समाजमा फेरी अर्को डरलाग्दो घटना भएको छ । टेक्ससमा तीन जना नेपालीको गोली काण्डमा मृत्यु भएको छ । टेक्सस राज्यको डालास सहरमा हत्यापछि आत्महत्या गोली काण्डमा एकै परिवारका तीन जनाको मृत्यु भएको प्रहरीले बताएको छ ।
गत शनिबार बिहान २ बजे राती डडली स्ट्रिटको १९०० ब्लकमा गोली काण्ड भएको डालास प्रहरीले विज्ञप्तिमार्फत जानकारी दिएको छ । प्रहरीका अनुसार ५३ वर्षीय ललित प्रधानले आफ्नी ३७ वर्षीया पत्नी रञ्जना श्रेष्ठ र तीन वर्षीय छोरा प्रनिश प्रधानलाई गोली हानी हत्या गरेका थिए ।
ललितले पत्नी र छोरालाई गोली हानी हत्या गरेपछि सोही पेस्तोल प्रयोग गरेर आफूमाथि गोली प्रहार गरी आत्महत्या गरेको प्रहरीले जनाएको छ । प्रहरीका अनुसार रञ्जना र प्रनिशको घटनास्थलमै मृत्यु भएको र ललितलाई अस्पताल पुर्याएपछि मृत घोषणा गरिएको थियो । ललितले लामो समयदेखि डिप्रेसनको औषधि सेवन गर्दै आएका थिए । ललितले घटनाको एक दिन अघि मात्र आफू लामो समयदेखि तनावमा रहेको र काममा समेत उपस्थित हुन नसकेको बारे आफ्नो फेसबुकवालमा पोष्ट गरेका थिए ।
नेपाली समाज टेक्ससका महासचिव विजय भुसालका ललित नेपाली भाषी भुटानी र उनकी श्रीमति नेपाली मुलको रहेको जानकारी दिए । घटनापछि शव नेपाल पठाउनेबारे पनि प्रयास भइरहेको उनले बताए ।
यसअघि दुई महिनाअघि जुन ५ मा भर्जिनिया राज्यमा पर्ने मनासस सहरमा एकै परिवारका चार जना नेपाली मृत फेला परेका थिए । मनासस घटनामा पनि प्रहरीले हत्यापछि आत्महत्या भएको जनाएको थियो । प्रहरीका अनुसार मनासस घटनामा ३८ वर्षीय सन्तोष परियार, ३६ वर्षीया अञ्जु श्रेष्ठ, २ वर्षीय बालक र ८ वर्षीया बालिकाको गोली प्रहारबाटै मृत्यु भएको थियो ।
