अस्ट्रेलियास्थित भिक्टोरिया राज्यको मेरिबेक सिटी काउन्सिल र भरतपुर महानगरपालिकाबीच भगिनी सम्बन्ध कायम गर्ने निर्णय भएको छ । यी दुई स्थानीय निकाय एकआपसको ‘सिटी सिस्टर’ बन्ने भएका छन् । यस निर्णयसँगै भरतपुर महानगरपालिका अस्ट्रेलियाको स्थानीय निकायसँग भगिनी सम्बन्ध बनाउने पहिलो नेपाली स्थानीय निकाय बनेको छ ।
यहाँस्थित मेरिबेक काउन्सिलले दुई दिनअघि भएको काउन्सिलको बैठकबाट भगिनी सम्बन्ध स्थापना गर्ने प्रस्तावलाई पारित गरेको छ । काउन्सिलका काउन्सिलर क्रिस माइल्सले राखेको प्रस्ताव मेयर हेलेन डेभिडसनसहितबाट सर्वसम्मत पारित भएसँगै दुई स्थानीय निकायबीच सहकार्यको बाटो खुलेको हो ।
यसका लागि भिक्टोरियामा रहेका नेपालीले लामो समयदेखि नै पहल गर्दै आएका थिए । भिक्टोरियास्थित अवैतनिक वाणिज्यदूत नीराजन गौलीले नेपाल र अस्ट्रेलियाका दुई सहरबीच पहिलो पटक भगिनी सम्बन्ध कायम भएको बताए । गौलीले नेपाल र अस्ट्रेलियाबीचको द्विदेशीय सम्बन्धमा यो महत्त्वपूर्ण र अत्यन्तै सकारात्मक कदम भएको जनाए ।
यसका लागि औपचारिकता दिन र सहमति (एमओयू) गर्नका लागि दुई निकायका प्रतिनिधिको बैठक चाँडै बस्नेछ । दुई निकायका प्रतिनिधिको बैठकबाट सहमति भएपछि यसले औपचारिकता पाउनेछ । ५० हजारभन्दा बढी नेपालीको बसोबास रहेको भिक्टोरिया राज्यको ठूलो र विकसितमध्येको काउन्सिलले नेपालको स्थानीय निकायसँग सहकार्य गर्नुलाई आप्रवासी नेपालीहरूले ठूलो उपलब्धि मानेका छन् ।
