अमेरिका, अस्ट्रेलिया र बेलायतमा अवैध हिरासत र निर्वासन अभ्यासको द्रुत विस्तारले आप्रवासीलाई आतंकित बनाई रहेको बेला जर्मन सरकारले पनि आप्रवासनमा कडाई गर्न थालेको छ । जर्मनीको संसदले यसै हप्ता तीव्र गतिमा नागरिकता दिने कार्यक्रम फिर्ता लिएसंगै आप्रवासीप्रति कडा निित लिन शुरु गरेको छ । जसले श्रमको तीव्र अभाव भोगिरहेको युरोपको आर्थिक शक्तिशाली राष्ट्रमा आप्रसनप्रति छिटो बदलिँदो धारणा स्पष्ट गर्दछ । यस वर्षको निर्वाचन अभियानमा चान्सलर फ्रेडरिक मर्जको कन्सर्भेटिभ पार्टीले उक्त कानुन फिर्ता लिने प्रतिबद्धता जनाएको थियो । उक्त कानुनले “असाधारण रूपमा राम्रोसँग एकीकृत” व्यक्तिहरूलाई पाँच वर्षको सट्टा तीन वर्षमै नागरिकता लिन अनुमति दिएको थियो ।
“जर्मन पासपोर्ट सफल एकीकरण प्रक्रियाको मान्यताको रूपमा आउनुपर्छ, गैरकानुनी आप्रवासनका लागि प्रोत्साहनको रूपमा होइन,” भनी गृहमन्त्री अलेक्जान्डर डोब्रिन्ड्टले संसदमा बताएका छन । नयाँ नागरिकता कानुनको बाँकी भाग—पूर्व चान्सलर ओलाफ शोल्जको समाजवादी, उदारवादी र हरित गठबन्धन सरकारले ल्याएको मुख्य उपलब्धि—यथावत रहनेछ, यद्यपि कन्सर्भेटिभहरूले त्यसबेला द्वैध नागरिकता र प्रतीक्षा अवधि आठ वर्षबाट पाँच वर्षमा घटाउने नवप्रवर्तनहरू उल्ट्याउने प्रतिज्ञा गरेका थिए ।
हाल मर्जको गठबन्धनमा जुनियर साझेदार बनेको एसपीडीले (सोसल डेमोक्र्याटिक पार्टी) परिवर्तनको समर्थनको बचाउ गर्दै भन्यो तीव्र प्रक्रियाको प्रयोग निकै कम भएको र नागरिकता सुधारको मूल भावना कायम रहेको छ।
सन् २०२४ मा अभूतपूर्व ३ लाख जनाले जर्मन नागरिकता पाएका मध्ये केही सय मात्र तीव्र प्रक्रियाबाट आएका थिए, जुन मूलतः उच्च सीपयुक्त र चलायमान जनशक्तिलाई आकर्षित गर्न बनाइएको योजना थियो—त्यो पनि यस्तो समयमा जब जर्मनीले गम्भीर श्रम अभावको सामना गरिरहेको छ ।