नेपाली कांग्रेसको प्रवास संगठन नेपाली जनसम्पर्क समिति अमेरिकाको सभापतिमा मुनिन्द्र नेम्वाङ निर्वाचित हुनुभएको छ । शुक्रबार सुरु भई आइतबार भर्जिनियामा सम्पन्न नेजसको तेस्रो अधिवेशनबाट नेम्वाङ सभापतिमा निर्वाचित हुनुभएको हो । सभापति पदका लागि नेम्वाङसहित पाँच जनाले उम्मेदवारी दिएका थिए । झण्डै चार हजार सदस्य रहेको नेजस अमेरिका नेपाली कांग्रेसको सबैभन्दा ठुलो प्रवास संगठन मानिन्छ ।
अधिवेशनबाट १२ पदाधिकारी र १६ सदस्यसहित २८ सदस्यीय केन्द्रीय कार्यसमिति चयन गरिएको छ । समितिको वरिष्ठ उपसभापतिमा विनोद भट्ट निर्वाचित हुनुभएको छ भने उपसभापतिहरूमा सञ्जीव श्रेष्ठ, श्रीराम थापा, हरिप्रसाद शर्मा र निमा वाङ्जन निर्वाचित हुनुभएको निर्वाचन समितिले जनाएको छ ।
निर्वाचन समितिका अनुसार महामन्त्रीद्वयमा नारायण खनाल र गौतम दाहाल निर्वाचित हुनुभएको छ । सहमहामन्त्रीमा अनीता परियार र अर्जुन बम निर्वाचित हुनुभएको छ । त्यसैगरी, कोषाध्यक्षमा नारायणप्रसाद पोखरेल तथा युवा उपसभापतिमा सुशील खत्री निर्वाचित हुनुभएको छ । नेजस अमेरिकाको यो अधिवेशन १२ वर्षपछि सम्पन्न भएको हो । नेम्वाङ यसअघि आनन्द विष्टको सभापतित्वमा गठित कार्यसमितिमा महासचिव रहनुभएको थियो ।
निर्वाचित भएपछि उहाँले लोकतान्त्रीकरण, सामाजिकीकरण र आधुनिकीकरणका लागि पार्टीको नीति अनुरूप काम गर्ने प्रतिबद्धता व्यक्त गर्नुभयो । साथै, “एक पटकको नेपाली, सधैँको नेपाली” भन्ने मूल नारालाई विशेष प्राथमिकताका साथ अघि बढाउने बताउनुभयो । यसअघि नेपाली कांग्रेसका महामन्त्री गुरुराज घिमिरेले अधिवेशनको उद्घाटन गर्दै पार्टीका नीति तथा कार्यक्रमबारे जानकारी गराउनुभएको थियो । समारोहमा अमेरिकाका विभिन्न राज्यबाट आएका करिब ६ सय मतदाता तथा शुभेच्छुकको उपस्थिति रहेको थियो । अधिवेसन उद्घाटनका लागि काँग्रेस महामन्त्रि गुरुराज घिमिरे कार्यक्रममा कार्यक्रममा सअभागी हुनु भएको थियो ।
