विधार्थीको नाममा काम गर्न गएका ४७ जना नेपालीलाई रुस र बुल्गेरियाबाट डिर्पोट गरिएको समाचार छ । गैरआवासिय नेपाली संघका अनुसार डिपोर्ट गरिएका ४७ नेपाली स्वदेश फर्किएको छ ।रुसले विश्वविद्यालय नियमित नगएका र स्थानीय श्रम प्रशासनबाट इजाजत नलिई काम गरेका २९ नेपालीलाई स्वदेश फिर्ता गरेको हो भने बुल्गेरियाले मानव तस्करको जालोमा परेका १८ नेपालीलाई घर फर्काएको एनआरएनका प्रतिनिधिले बताए ।
रुसी प्रशासनले मस्कोको कुजमिन्की कल सेन्टरबाट कात्तिक १४ गते ३४ नेपाली पक्राउ गरेको र स्थानीय अदालतले उनीहरूलाई स्वदेश फिर्ता पठाउन स्वीकृति दिएको बताइएको छ । २९ जनालाई एयर अरेबियाको उडानबाट नेपाल पठाएको थियो । बाँकी ५ जना भने ‘डिपोर्ट’ को प्रक्रियामा रहेको बताइएको छ ।
एता नेपाल फर्काइएका विद्यार्थीले आफूहरूलाई शैक्षिक परामर्शदाताले धोका दिएको आरोप लगाई रहेको छ । रुस गएपछि पढ्न र काम गर्न जति पनि पाइन्छ भनेर एजुकेसन कल्सटेन्सीले पठाएको भन्दै काम गरिरहेको बेला पक्राउ प¥यौं अनि डिर्पोट गरियो ।
गैरआवासीय नेपाली संघ रुसले पक्राउ परेका विद्यार्थीसँग बलियो कागजात नभएका कारण कानुनी हक खोज्न नसकिएपछि डिार्पोट गरिएको बताए । उता रुसका लागि कार्यवाहक नेपाली राजदूत सुशील घिमिरेले पनि स्थानीय कानुन उल्लंघन गरेकाले उनीहरूका पक्षमा कानुनी लडाइँ लड्न नसकेको बताएका छन । आर्थिक वर्ष ०७९, ८० मा मात्रै रुसमा पढ्नका लागि ९ सय ९६ जनालाई शिक्षा मन्त्रालयले ‘नो अब्जेक्सन सर्टिफिकेट जारी गरेको देखिन्छ ।
बुल्गेरियाले भने मानव तस्करको जालोमा परेर भारतबाट रोमानिया, हंगेरी हुँदै पुगेका नेपालीलाई स्वदेश फर्काएको हो । उनीहरूलाई बुल्गेरियाले सरकारी टिकटमा समूह–समूह बनाई नेपाल पठाएको थियो । गत बिहीबारसम्ममा १८ जना नै काठमाडौं आइपुगेका छन् । बुल्गेरियामा रहेका नेपालीलाई कन्सुलर सेवा दिँदै आएको जर्मनीस्थित नेपाली दूतावासका अनुसार बुल्गेरिया प्रवेशको आधिकारिक कागजात नभएपछि उनीहरू पक्राउ परेका थिए ।
