त्रिभुवन विश्वविद्यालयले देशभरका २४ आंगिक क्याम्पसमा आइतबार क्याम्पस प्रमुख नियुक्त गरेको छ । त्रिविका प्रवक्ता एमनसिंह बोहोराले कार्यकारी परिषद्को बैठकले क्याम्पस प्रमुख नियुक्तिको निर्णय गरेको बताए । क्याम्पस प्रमुख नियुक्तिका लागि त्रिविले छनौट तथा सिफारिस समिति गठन गरेको थियो ।
समितिले गरेको सिफारिसको आधारमा नियुक्ति गरिएको त्रिविले जनाएको छ । प्रतिस्पर्धाको आधारमा नियुक्तिका लागि दरखास्त आह्वान गर्ने, मूल्यांकन गर्ने गरी कार्यविधिसमेत जारी भएको छ । सोही प्रक्रियाबाट त्रिविले ८ डिनको नियुक्तिसमेत गरिसकेको छ ।
त्रिवि प्रवक्ता बोहाराकाअनुसार शंकरदेव क्याम्पस काठमाडौंमा सहप्राध्यापक कपिल खनाल, नेपाल कमर्श क्याम्पसमा सहप्राध्यापक जितेन्द्रप्रसाद उपाध्याय, ललितकला क्याम्पसमा उपप्राध्यापक यामप्रसाद शर्मा, भैरवहा क्याम्पसमा लक्कीप्रसाद जोशी, सानोठिमी क्याम्पसमा उपप्राध्यापक माधवप्रसाद श्रेष्ठ क्याम्पस प्रमुख नियुक्त भएका छन् । त्यस्तै महेन्द्र बहुमुखी क्याम्पस नेपालगञ्जमा सहप्राध्यापक लालमणि आचार्य, सुर्खेत बहुमुखीमा सहप्राध्यापक माधवप्रसाद खनाल, विश्वभाषा क्याम्पस काठमाडौंमा उपप्राध्यापक महेन्द्रकुमार बुढाथोकी, पाटन संयुक्त क्याम्पसमा सहप्राध्यापक रघुवीर विष्ट र बुटबल बहुमुखी क्याम्पसमा उपप्राध्यापक अरुणकुमार क्षेत्री प्रमुख नियुक्त भएका छन् ।रामस्वरुप रामसागर क्याम्पस जनकपुरमा प्राध्यापक बसन्तकुमार कर्ण, भोजपुर बहुमुखीमा सहप्राध्यापक पर्वतकुमार राई, पृथ्वीनारायण क्याम्पस पोखरामा प्राध्यापक हरिप्रसाद पाठक, रत्नराज्य लक्ष्मी क्याम्पस काठमाडौंमा सहप्राध्यापक पदमकुमार अधिकारी, सूर्यनारायण सत्यनारायण क्याम्पस सिरहामा सहप्राध्यापक राजेश्वरप्रसाद यादव नियुक्त गरिएको छ ।
त्यस्तै डोटी बहुमुखी क्याम्पसमा सहप्राध्यापक दिलानन्द जोशी, त्रिभुवन बहुमुखी क्याम्पस पाल्पामा उपप्राध्यापक टंकप्रसाद पन्थ, जुम्ला बहुमुखी क्याम्पसमा उपप्राध्यापक प्रकाशचन्द्र खत्री, वनविज्ञान अध्ययन संस्थान पोखरामा सहप्राध्यापक नारायणप्रसाद गौतम, कृषि र पशु विज्ञान अध्ययन संस्थान लमजुङ क्याम्पसमा उपप्राध्यापक रामकुमार श्रेष्ठ नियुक्त भएका छन् । पक्लिहवा क्याम्पसमा सहप्राध्यापक जन्मजय गैरे, मेची बहुमुखी क्याम्पस झापामा सहप्राध्यापक देवीप्रसाद आचार्य, केन्द्रीय प्रविधि क्याम्पस धरानमा प्राध्यापक बसन्तकुमार राई र धौलागिरि बहुमुखी क्याम्पस बागलुङमा सुदर्शन सिलवाल क्याम्पस प्रमुख नियुक्त भएका छन् ।
त्रिवि कार्यकारी परिषद्ले गत असोजमै छनोट तथा सिफारिस समिति गठन गरेको भए पनि सिफारिस र नियुक्तिमा भने ढिलाई हुँदै आएको थियो । धेरै वटा क्याम्पसमा एकै पटक नियुक्ति गर्न लाग्दा प्रक्रिया लामो भएको भन्दै आलोचना हुँदै आएको थियो । यी क्याम्पसमा निमित्त क्याम्पस प्रमुखको व्यवस्था हुँदै आएको थियो ।
त्रिविका ६४ वटा आंगिक क्याम्पस सञ्चालनमा छन् ।
