परराष्ट्र मन्त्रालयले केहि सहसचिवलाई विदेशस्थित नेपाली महावाणिज्यदूतमा सरुवा गरेको छ। यसअघि सहसचिव तहका अधिकारीहरू राजदूत वा कतिपय नियोगमा उपप्रमुखको जिम्मेवारीमा पठाइने भए पनि पहिलोपटक महावाणिज्यदूतावासकै जिम्मेवारीसहित सरुवा गरिएको हो। परराष्ट्र मन्त्रालयले दिएको जानकारी अनुसार अनुसार परराष्ट्र सेवाबाट पहिलोपटक महावाणिज्यदूत बन्ने अवसर पाउनेमा सुरेश अधिकारी टेक्सास डलास अमेरिका, लक्ष्मण खनाल सानफ्रान्सिस्को–अमेरिका, हरि ओडारी दुबई–यूएई रहेका छन्। तीन स्थानमा महावाणिज्यदूत स्थापना गर्ने निर्णय गत कार्तिकमा भएको थियो ।
यसैगरी अपग्रेड गरिएका दुई महावाणिज्यदूतावासमा पनि परराष्ट्र मन्त्रालयकै प्रथम श्रेणीका अधिकारीहरूलाई सरुवा गरिएको छ। त्यसमध्ये न्युयोर्कस्थित महावाणिज्यदूतावासको प्रमुखमा ददी भण्डारी र जेद्दामा पारस पण्डित सरुवा भएका छन्। यसअछि यी महावाणिज्यदूतावासको प्रमुख उपसचिव तहका अधिकारी थिए। यसअघि भारतको कलकत्ता, चीनको ल्हासा, छन्दु, हङकङ, गोन्जाओ, साउदी अरबको जेद्दा र संयुक्त राज्य अमेरिकाको न्युयोर्कमा गरी नेपालका कुल ७ वटा महावाणिज्य दूतावास थिए। गत कार्तिकमा थप तीन सहरमा नयाँ महावाणिज्यदूतावास स्थापना गर्ने निर्णयसँगै नेपाली महावाणिज्यदूतावासहरूको संख्या १० पुगेको छ।
परराष्ट्र मन्त्रालय श्रोतका अनुसार तीनजना सहसचिवहरूलाई पनि विभिन्न नियोगमा उपनियोग प्रमुखका रुपमा सरुवा गरेको छ। त्यसमध्ये रोशन खनालले बेइजिङस्थित नेपाली राजदूतावासमा उपनियोग प्रमुखको जिम्मेवारी पाएकी छन् भने डमरुबल्लभ भट्टराईलाई जेनेभा र धनबहादुर मगरलाई न्युयोर्कस्थित राष्ट्रसंघीय नियोगमा उपनियोग प्रमुखको जिम्मेवारी दिइएको छ।
त्यसो त यसअघि पनि महावाणिज्य दूतावासहरूमा सहसचिव तहकै कर्मचारी पठाइने गरिन्थ्यो। तर, उनीहरू परराष्ट्र सेवाका नभई निजामती अन्तर्गत अन्य सेवाका सहसचिवहरू हुने गर्थे। कार्तिकमा परराष्ट्र सेवा अन्तर्गत ११ जना सहसचिव र दुुई मुलुकका तीन सहरमा नयाँ महावाणिज्यदूतावास स्थापनासँगै परराष्ट्र सेवाबाट पनि महावाणिज्यदूत पठाउने निर्णय गरिएको हो। पछिल्लो समय दरबन्दी थप पछि पपराष्ट्र मन्त्रालय चलायमान भएको छ ।
