अमेरिकामा जन्मेकी एक अमेरिकी नागरिक तथा म्यासाचुसेट्सकी आप्रवासन कानुन व्यवसायीले आफूलाई आप्रवासन अधिकारीहरूले देश छोड्नू पर्ने व्यहोरा उल्लेख भएको इमेल पठाएको खुलासा गरेकी छन् । निकोल मिचेरोनीले ११ अप्रिलमा आएको एउटा इमेलको बारेमा बताउँदै भनिन् कि त्यसको शीर्षक थियो “प्यारोलको समाप्तिको सूचना” ।
इमेलमा लेखिएको थियोः “तपाईं अब अमेरिका छोड्ने समय आएको छ । यदि तपाईं तुरुन्तै अमेरिका नछोड्नु भएमा तपाईंमाथि कानुनी कारबाही हुन सक्नेछ र तपाईंलाई अमेरिका निकालिन सक्नेछ ।” मिचेरोनीले सन्चार माध्यममा दिएको बयानमा “पहिलोपटक त मैले सोचेँ यो कुनै मेरो क्लाइन्टको लागि हो, तर जब मैले ध्यानपूर्वक हेरेँ, त्यो इमेलमा मेरो नाम मात्रै थियो ।” उनले थपिन्, “शायद गल्तीले मलाई पठाइएको होला भन्ने आशा छ । तर यस्तो इमेल अमेरिकी नागरिकहरूलाई आइरहेका छन् भन्ने कुरा अलिकति चिन्ताजनक छ ।”
मिचेरोनीलाई आएको इमेलको खबर त्यस्तो समय आएको हो जब ट्रम्प प्रशासनले गैर–नागरिकहरूलाई अमेरिका बाट हटाउने कडा अभियान चलाइरहेको छ । जसमा कानुनी रूपमा अमेरिका बसोबास गरिरहेका र कुनै अपराधमा संलग्न नभएका व्यक्तिहरू पनि समावेश छन् । ट्रम्पले यसअघि निर्दिष्ट नगरिएको अपराध गर्ने अमेरिकी नागरिकहरूलाई पनि देशबाट निकालेर एल साल्भाडोरको जेलमा पठाउने बारेमा खुलेर टिप्पणी गरेका छन् ।
अमेरिकी आन्तरिक सुरक्षा विभागले जनाए अनुसार मिचेरोनीको नाम र सम्पर्क विवरण उनका क्लाइन्टहरूको कागजातमा भएको कारणले गर्दा त्यस्तो सूचना पठाइएको हुनसक्छ ।