कृष्णराज खनाल
नर्थ क्यारोलिना । विगतका वर्षहरुझै यस वर्ष पनि नर्थ क्यारोलिनाको
मोरिसभिलमा शनिवार अर्थात् अप्रिल १९ मा नेपाल दिवस मनाउने तयारी भइरहेको छ । नर्थ
क्यारोलिनास्थित नेपालीहरुको साझा संस्था नेपाल सेन्टर फर नर्थ क्यारोलिना
एनसीएनसी यसको संयोजनमा तयारी पुरा भएको जानकारी दिईएको छ ।
टाउन अफ मोरिसभिल र एपेक्स तथा वेक काउन्टीले अप्रिलको तेस्रो शनिवारलाई
नेपाल दिवसको रुपमा घोषणा गरेर सो कार्यक्रम गर्न लागिएको हो ।
नेपाल दिवसको कार्यक्रम नेपालीहरुको बाक्लो उपस्थिति रहेको मोरिसभिलस्थित सेडर
फोर्क डिष्ट्रिक पार्कमा हुने जनाइएको छ । एनसीएनसीले जारी गरेको विज्ञप्ति
अनुसार कार्यक्रमको सुरुवात नेपाली विविधता झल्किने साँस्कृतिक झाँकीसहित हुने
छ । संस्थाकी महासचिव कल्पना भण्डारी अर्यालले दिएको जानकारी अनुसार, नेपाल
दिवसमा नेपाली र नेपाललाई माया गर्ने झण्डै दुई हजार मानिस
सहभागी हुन सक्ने बताइएको छ । सो अवसरमा नेपाली नयाँ वर्षको सुभकामना आदान प्रदान,

नेपाली नृत्य र गीत सहितको रमाइलो कार्यक्रम दिनभर सञ्चालन हुने छ । यस
अतिरिक्त नेपाली खाद्य परिकार र नेपाली कला र संस्कृति झल्कने खालका स्टलहरु पनि
राखिनेछ ।
संस्थाका अध्यक्ष डा. विकास शाक्यका अनुसार, प्रवासमा स्थानीय सरकारको मान्यतासहित
नेपाल दिवस मनाउन पाउनु आफैमा गर्वको कुरा भएको बताउँदै यस कार्यक्रमले
प्रवासमा नेपाली संस्कृतिलाई जीवन्त राख्न र अमेरिकी मुल प्रवाहमा नेपाली
समुदायको साँस्कृतिक, सामाजिक र आर्थिक योगदानलाई स्थापित गर्न मद्धत पुग्न सक्नेछ ।

डा. शाक्यले विदेशिएका दोस्रो पुस्ताका नेपालीलाई आफ्नो मौलिक परम्परा र स्वदेशसँग

जोडिराख्न यसले ठुलो योगदान पुर्याउँछ भन्दै सहभागी सबैलाई नेपाली भेषभुषासहित उपस्थित हुन पनि आव्हान गर्र्नुभएको छ ।