बेलायती राजकुमार प्रिन्स ह्यारीले आफनो र व्यक्तिगत सुरक्षासम्बन्धी कानुनी चुनौती गुमाएपछि आफूले पत्नी र बच्चाहरूलाई बेलायत फिर्ता ल्याउन “असम्भव” भएको बताएका छन । परिवारसँग मेलमिलापको चाहना अझै पनि रहेको खुलासा गर्दै आफ्नो सुरक्षा चुनौति रहेको भन्दै अमेरिकामा बसी रहेका उनले बेलायतले आफ्नो सुरक्षा ग्यारेन्टि गर्न नसकेको बताएका हुन ।
बिबिसिसँगको एक भावुक अन्तर्वार्तामा प्रिन्स ह्यारीले आफ्ना बुवा राजा चाल्र्ससँग “सुरक्षासम्बन्धी कुराकानीका कारण” कुरा हुन नपाएको दावी गरेका छन । तर उनले मेलमिलापको आशा राखेको बताएका छन् । किनभने जीवन “अत्यन्त मूल्यवान” छ र क्यान्सरको निदान भइसकेका आफ्ना बुबासँग कति समय बाँकी छ भन्ने आफूलाई थाहा नभएको बताएका छन् । अमेरिकाको क्यालिफोर्नियामा बस्दै आएका ४० वर्षीय ह्यारीले भनेः “हालको अवस्थामा, मेरो परिवारलाई बेलायत फर्काउने कुरा सुरक्षित रूपमा सम्भव छैन ।” उनले थपेः “अहिलेकै अवस्थामा मैले मेरी पत्नी र बच्चाहरूलाई बेलायत ल्याउने कुनै सम्भावना देख्दिन… म मेरो देशलाई माया गर्छु । सधैं गरेको छु, यद्यपि केही व्यक्तिहरूले मसँग जे गरे पनि मलाई बेलायतको सम्झना आउँछ । र यो साँच्चिकै दुःखद कुरा हो कि म मेरा बच्चाहरूलाई सुरक्षाकै कारण मेरो मातृभूमि देखाउन सक्दिन ।”
ह्यारीले २०२० मा रानी दरबारका औपचारिक जिम्मेवारीहरू त्यागेपछि, बेलायतमा उनको सुरक्षामा गरिएको परिवर्तनलाई उल्ट्याउने प्रयास गरेका थिए । त्यसपछि उनले बेलायत छोडेका हुन । उनीलाई “अनुकूलित” सुरक्षा व्यवस्था प्रस्ताव गरिएको थियो, जसलाई उनले कमजोर ठानेका थिए । प्रिन्स ह्यारीले यो विषय समाधान गर्न उनका बुवाको (राजा चाल्र्सको) भूमिका हुनसक्ने भन्दै जोड दिएका छन् यद्यपि उनले बुबालाई प्रत्यक्ष रूपमा हस्तक्षेप गर्न भनेका छैनन् । “म बेलायतमा सुरक्षित रूपमा आउन सक्छु भने त्यो निमन्त्रणा प्राप्त भए मात्र हो, र यसमा मेरो बुबाको हातमा धेरै नियन्त्रण र क्षमता छ । तर संवैधानिक दृष्टिकोणले, जब सरकार र अदालतहरूले मुद्दा विचार गरिरहेका छन्, त्यस्तो अवस्थामा राजा चाल्र्सले प्रत्यक्ष रूपमा हस्तक्षेप गर्नु अनुपयुक्त हुने बुझिएको छ ।
ह्यारीले बेलायतका प्रधानमन्त्री कीर स्टार्मरलाई अपिल गर्दै भनेका छनः “यो सबै अघिल्लो सरकारले सुरु गरेको थियो । अहिले नयाँ सरकार छ । मलाई तथ्य जान्नेहरूले भनेअनुसार, यो एक परम्परागत सत्तावर्गद्वारा मिलेमतोमा गरिएको अन्यायपूर्ण बन्दोबस्त गरिएको हो र मलाई त्यही महसुस भइरहेको छ ।”
