अमेरिकी राष्ट्रपति डोनाल्ड ट्रम्पले विदेशी भूमिमा निर्माण भएका सबै चलचित्रहरूमा १०० प्रतिशत ट्यारिफ लगाउने निर्णय लिएको आफ्नै ट्रुथ सोसल प्लेटफर्ममा घोषणा गरेका छन । अन्य देशहरूले अमेरिकी फिल्म निर्माता र स्टुडियोलाई आकर्षित गर्न दिएका प्रोत्साहनहरूले गर्दा अमेरिकी चलचित्र उद्योग “एकदमै छिटो मर्दै गएको” भन्दै अमेरिकी भुमिमा चलचित्र निर्माण गर्न प्रोत्सहान गर्ने बताएका हुन । ट्रम्पका अनुसार उनले वाणिज्य विभाग र अमेरिकी व्यापार प्रतिनिधिलाई यस्तो ट्यारिफ तुरुन्त लागू गर्न निर्देशन दिएका छन् ।
एक अध्ययन पछिल्लो दशकमा लस एन्जलसमा चलचित्र र टेलिभिजन निर्माण करिब ४० प्रतिशतले घटेको छ । यसैबीच, संसारभरका सरकारले फिल्म निर्माण आकर्षित गर्न कर छुट र नगद प्रोत्साहन दिने गरेका छन् । २०२५ मा सामग्री निर्माणमा विश्वभरि झण्डै २४८ अर्ब डलर खर्च हुने छ, जसमा बढी हिस्सा पाउन सबै देशहरू लागिपरेका छन् । चलचित्र उद्योग पहिले नै यस्ता ट्यारिफहरूको असर महसुस गरिरहेको छ, किनभने चीनले अप्रिल महिनामा अमेरिकी चलचित्रको कोटा घटाएर प्रतिक्रिया दिएको थियो ।
चीन अमेरिका पछिको दोस्रो ठूलो चलचित्र बजार हो, यद्यपि पछिल्ला वर्षहरूमा त्यहाँका स्वदेशी चलचित्रहरूले हलिउड चलचित्रलाई छायामा पारेका छन् ।
