भारत र पाकिस्तानबीच युद्धविरामको खबरले वैश्विक राजनीतिक मञ्चमा चर्चा भइरहँदा अर्को युद्ध पनि रोकिने संघारमा रहेको छ । रुस र युक्रेनका राष्ट्रपतिका भनाइलाई आधार मान्ने हो भने दुई देशबीच छिट्टै नै शान्ति वार्ता हुँदैछ । रुसी राष्ट्रपति भ्लादिमिर पुटिनले नै शान्ति वार्ताका लागि प्रस्ताव गरेपछि दुई देशबीचको करिब ३ वर्षे लामो संघर्ष रोकिने आशा गरिएको छ । राष्ट्रपति पुटिनले मिति नै तोकेर दीर्घकालीन शान्तिका लागि भन्दै युक्रेनसमक्ष वार्ताको प्रस्ताव गरेका छन् । क्रेमलिन प्रवक्ता दिमित्री पेस्कोभले राष्ट्रपति पुटिनले युक्रेन संकटमा शान्तिपूर्ण समाधान चाहेको बताएका छन् । अर्को महत्वपुर्ण कुरा सो वार्तामा अमेरिकी राष्ट्रपति डोनाल्ड ट्रम्प पनि सहभागी हुने संभावना रहेको बताईन्छ । यसै पनि अमेरिकी राष्ट्रपति ट्रम्पले ह्वाइट हाउसमा पत्रकारहरूसँग कुरा गर्दै इस्तानबुलको वार्ता उपयोगी हुन सक्ने र आफू बिहीबार क्षेत्रमा रहँदा त्यसमा सहभागी हुन सक्ने बताए। उनको यो साता साउदी अरब, संयुक्त अरब इमिरेट्स र कतार भ्रमणको तालिका छ।
युक्रेन, फ्रान्स, जर्मनी, पोल्यान्ड र बेलायतले ३० दिने युद्धविरामको आह्वान गरेपछि पुटिनको प्रस्ताव आएको हो । यी मुलुकका नेताहरूले किभमा वार्ता गरेर युद्धिविरामको आह्वान गरेका थिए । युद्धविरामका लागि प्रस्ताव नमाने मस्कोमाथि प्रतिबन्ध बढाउने अमेरिकी राष्ट्रपति डोनाल्ड ट्रम्पको चेतावनीपछि पुटिनको प्रस्ताव आएको अलजजिराले उल्लेख गरेको छ । यद्यपि पुटिनले भने उक्त प्रस्ताव अस्वीकार गरेका थिए । उनले युरोपेली ुअल्टिमेटमु र ुरुसविरोधी बयानबाजीु को आलोचना गरेका थिए । नयाँ ढंगले वार्ताका लागि भन्दै उनले प्रस्ताव अघि सारेका हुन् ।
युक्रेनी राष्ट्रपति भोलोदिमिर जेलेन्स्कीले पनि रुसी प्रस्तावको स्वागत गरेका छन् । उनले भनेका छन्, ‘पूरा विश्व यही दिनका लागि लामो समयदेखि प्रतीक्षारत थियो ।’ राष्ट्रपति जेलेन्सकीले सामाजिक सञ्जाल एक्समा लेखेका छन्, ‘एक दिन पनि मान्छे मारिरहनुको कुनै अर्थ छैन । रुसका तर्फबाट भोलिबाटै(मे १२) पूर्ण रूपमा भरपर्दो र विश्वसनीय तरिकाको युद्धविराम हामी चाहन्छौँ । युक्रेन वार्ताका लागि तयार छ ।’
सन् २०२२ को फेब्रुअरी २४ मा रुसले युक्रेनमाथि आक्रमण सुरु गरेको थियो । त्यसको एक हप्तापछि दुई देशबीच इस्तानबुलमा वार्ता भए पनि युद्ध रोक्न सहमत भएका थिएनन् । रोयटर्सका अनुसार पछिल्लो ३ वर्षमा रुस-युक्रेन युद्धमा हजारौँ सेना र सर्वसाधारण मारिएका छन् ।
