अमेरिका र साउदी अरेबियाले १४२ अर्ब डलरको हतियार सम्झौतामा हस्ताक्षर गरेका छन् । जसलाई ह्वाइट हाउसले “इतिहासकै सबैभन्दा ठूलो रक्षा बिक्री सम्झौता” भनेर वर्णन गरेको छ । यो सम्झौता डोनाल्ड ट्रम्पको खाडी राष्ट्रहरूको चार दिने कूटनीतिक भ्रमणको पहिलो चरणमा भएको हो ।
यो भ्रमण व्यापारिक हितहरूमा केन्द्रित थियो र ट्रम्प प्रशासनका लागि छिटो उपलब्धिहरू सुनिश्चित गर्ने उद्देश्यसहित गरिएको थियो । साउदी क्राउन प्रिन्स मोहम्मदले ट्रम्पसँगको लञ्चको दौरान अमेरिकामा ६०० अर्ब डलर लगानी गर्ने वाचा गरे, जसमा २० अर्ब डलरको कृत्रिम बौद्धिकता एआई डेटा केन्द्रहरू, १४.२ अर्ब डलरको ग्यास टर्बाइन र अन्य ऊर्जा उपकरण खरिद, करिब ५ अर्ब डलरको बोइङ ७३७–८ विमान, र अन्य सम्झौताहरू समावेश थिए ।
ह्वाइट हाउसले हतियार सम्झौतालाई “इतिहासकै सबैभन्दा ठूलो रक्षा बिक्री सम्झौता” भनेको छ र यो सम्झौतामा दर्जनभन्दा बढी अमेरिकी रक्षा कम्पनीहरूले हतियार, उपकरण तथा सेवा बिक्री गर्ने योजना समावेश छ । जसमा हवाई शक्ति विकास, अन्तरिक्ष प्रविधि, हवाई र क्षेप्यास्त्र सुरक्षा, र सीमा तथा समुद्री सुरक्षाका क्षेत्रहरू पर्दछन् ।
राष्टपति ट्रम्प रियाध पुग्दा शाही गार्डद्वारा स्वागत गरिएको थियो । जब ट्रम्पको एयर फोर्स वन विमान रियाध आइपुग्यो, उनलाई शाही साउदी वायु सेनाका १५ लडाकु विमानहरूले साथ दिएका थिए । त्यसपछि ट्रम्पले अल यमामा दरबारको एक भव्य कक्षमा साउदी राजा सलमानसँग बसेर भेट गरे । जहाँ अमेरिकी, साउदी र विश्वका प्रमुख व्यवसायिक व्यक्तित्वहरू पनि सहभागी थिए । सहभागीहरूमध्ये एलन मस्क, कृत्रिम बौद्धिकता क्षेत्रमा प्रभावशाली व्यक्ति स्याम अल्टम्यान, र विश्व चर्चित कम्पनीका प्रमुख कार्यकारीहरू थिए ।
जब साउदी राजा सलमानले अमेरिकाको अर्थतन्त्रमा ६०० अर्ब डलर लगानी गर्ने प्रतिबद्धता जनाए, ट्रम्प मुस्कुराए र मजाक गर्दै भने, “यो त १ ट्रिलियन डलर हुनुपथ्र्यो ।” यो भ्रमण ट्रम्पको “अमेरिका फस्र्ट” नीतिमा आधारित मध्यपूर्वको राजनीति पुनःसंरचनाको हिस्सा हो, जसले वैदेशिक गठबन्धन र अन्तर्राष्ट्रिय कानुनभन्दा अमेरिकी घरेलु आर्थिक तथा सुरक्षालाई प्राथमिकता दिन्छ ।
कतारको शाही परिवारले प्रस्ताव गरेको विलासी बोइङ ७४७–८ जम्बो जेटको उपहार हो । ह्वाइट हाउसले भनेको छ कि यो विमान राष्ट्रपतिको विमानका रूपमा रूपान्तरण गर्न सकिन्छ र ट्रम्पले पद त्याग गरेपछि उनको राष्ट्रपतीय पुस्तकालयलाई उपहार दिन सकिन्छ । यो कुनै पनि राष्ट्रपतिलाई विदेशी सरकारले दिएको सबैभन्दा मूल्यवान उपहार हुनेछ । राष्ट्रपति ट्रम्प त्यसपछि कतार जाने कार्यक्रम छ । क्षेत्रका उनका वार्ताहरू ठूला लगानी सम्झौताले भरिएका छन्, र त्यही रणनीति सिरियासँगको अमेरिकी नीतिमा भएको परिवर्तनमा पनि देखिएको छ ।
यो भ्रमण अर्कोतर्फ असाधारण छ, किनभने ट्रम्पले मध्यपूर्वको आफ्नै सबभन्दा नजिकको सहयोगी देश इसरायलको भ्रमण नगर्ने निर्णय गरेका छन् । यसको कारण गाजाको युद्ध र इसरायली प्रधानमन्त्री बेन्यामिन नेतन्याहूसँगको उनको तनावपूर्ण सम्बन्ध हो । ट्रम्पको भ्रमणपूर्व हमासले अन्तिम अमेरिकी बन्धक एडन अलेक्ज्याण्डरलाई मुक्त गरेको थियो, जसको उद्देश्य ट्रम्पमाथि नेतन्याहूमाथि युद्ध अन्त्यको लागि दबाब दिन प्रेरित गर्नु थियो ।