अमेरिकी निवार्तमान जो बाइडेनलाई प्रोस्टेट क्यान्सर भएको पुष्टि भएको छ । बाईडनको कार्यालयले सा् जानकारीलाई पुष्टि गरेको हो । पूर्वअमेरिकी राष्ट्रपति अहिले उपचारका विकल्पहरू परिवारसँग सल्लाह गरिरहेका छन्, क्यान्सर हड्डीसम्म फैलिएको बताइएको छ । ८२ वर्षीय बाइडेनलाई गत हप्ता पिसाबमा समस्या देखिएपछि र प्रोस्टेटमा गाँठो भेटिएपछि चिकित्सकहरूले जाँच गरेका थिए । अहिले बाइडेन र उनका परिवार उपचारका विकल्पहरूबारे विचार गर्दै छन् ।“यो रोगको आक्रामक रूप भए तापनि, क्यान्सर हर्मोन–संवेदनशील देखिएकोले प्रभावकारी रूपमा नियन्त्रण गर्न सकिने अवस्थामा छ,“ उनको कार्यालयले भनेको छ । “राष्ट्रपति र उनका परिवार अहिले चिकित्सकहरूसँग मिलेर उपचार विकल्पहरूका बारेमा छलफल गरिरहेका छन् ।“
प्रोस्टेट क्यान्सरको तीव्रता मूल्याङ्कन गर्न ‘ग्लिसन स्कोर’ भनिने मापन प्रयोग गरिन्छ, जसमा १ देखि १० सम्म अंक दिइन्छ, जहाँ क्यान्सरयुक्त कोषहरू सामान्य कोषहरूसँग तुलना गरिन्छ । बाइडेनको कार्यालयका अनुसार उनको स्कोर ९ छ, जसले क्यान्सर अत्यन्त आक्रामक रहेको देखाउँछ । जब प्रोस्टेट क्यान्सर शरीरका अन्य भागहरूमा फैलिन्छ, यो प्रायः हड्डीहरूमा जान्छ । राष्ट्रपति डोनाल्ड ट्रम्पले राजनीतिक प्रतिस्पर्धीप्रति सहानुभूति जनाउँदै आफूपत्नी मेलानिया ट्रम्पसहित चिन्ता व्यक्त गरेका छन् । ट्रम्पले आफ्नो सोशल मिडिया प्लेटफर्म ‘ट्रुथ सोसल’मा लेखे, “मेलानिया र म जो बाइडेनको पछिल्लो स्वास्थ्य अवस्थाबारे थाहा पाएर दुखी भएका छौं । हामी पूर्व प्रथम महिला जिल बाइडेन र समग्र परिवारप्रति हार्दिक शुभकामना व्यक्त गर्छौं र जोलाई छिटो र सफल रिकभरीको कामना गर्छौं ।”
बाइडेन अमेरिकी इतिहासकै सबैभन्दा उमेर पुगेका राष्ट्रपति थिए, र उनको स्वास्थ्य मतदाताहरूको प्रमुख चिन्ताको विषय थियो । उनले २०२० को राष्ट्रपति निर्वाचनमा तत्कालीन राष्ट्रपति ट्रम्पलाई हराएका थिए र गत वर्ष फेरि चुनाव लड्ने तयारी गरेका थिए । तर, उमेर र मानसिक सतर्कतासम्बन्धी प्रश्नहरू उठेपछि उनले उम्मेदवारी फिर्ता लिँदै ह्यारिसलाई आफ्नो उत्तराधिकारीको रूपमा समर्थन गरेका थिए ।
सन २०२२ मा, बाइडेनले क्यान्सरको मृत्यु दर २५ वर्षभित्र आधा घटाउने लक्ष्यसहित “क्यान्सर मूनशट” पहललाई आफ्नो प्रशासनको प्राथमिकतामध्ये एक बनाएका थिए । यो पहल उपराष्ट्रपतिका रूपमा गरेको उनको पहिलाको कामको निरन्तरता थियो त्यही रोग जसले उनका जेठा छोरा बियो बाइडेनको ज्यान लिएको थियो ।
बाइडेनले दशकौंदेखि सार्वजनिक जीवनमा धेरै दुःख र विपत्तिहरू सहन गरेका छन् । सन् १९७२ मा सिनेटमा निर्वाचित भएको केही समयपछि, उनकी पत्नी नेलिया र कान्छी छोरी नाओमीको कार दुर्घटनामा मृत्यु भएको थियो । राष्ट्रपति पदबाट बाहिरिने बेलामा उनले हंटर बाइडेन — जसलाई बाइडेन “मेरो एक मात्र बाँचेको छोरा” भन्छन् लाई संघीय हतियार र करसम्बन्धी अपराधमा दोषी ठहरिए पनि माफी दिए, यद्यपि उनले पहिले आफूले कुनै पारिवारिक सदस्यलाई माफी नदिने प्रतिबद्धता व्यक्त गरेका थिए ।