अमेरिकाले ब्राजिलको सर्वोच्च अदालतका आठजना न्यायाधीशको भिसा रद्द गरेको छ । भिसा रद्द गरिएका न्यायाधीशहरूमा लुइस रोबर्टो बारोसो, जोसे एन्टोनियो डियास टोफोली, क्रिस्टियानो जानिन, फ्लाभियो डिनो, कार्मेन लुसिया, लुइज एड्सन फाचिन र गिलमार मेंडेसको रहेको बताइएको छ । अमेरिकी विदेशमन्त्री मार्को रुबियोले ब्राजिलका आठजना सर्वोच्च अदालतका न्यायाधीशहरूको अमेरिकी भिसा रद्द गरेको पुष्टि गरेका छन । विदेशमन्त्रि रुबियोले एक्समा लेख्दै बोल्सोनारोमाथिको अनुसन्धानलाई “राजनीतिक खिचातानी”को संज्ञा दिँदै अनुसन्धानकर्ता न्यायाधीश अलेक्सान्द्रे डि मोराएस तथा उनका अदालतका सहयोगीहरूको भिसा रद्द गरिएको घोषणा गरेको उल्लेख छ ।
तीन न्यायाधीशहरू आन्द्रे मेंडोन्सा, कासियो नुनेस माक्र्वेस र लुइज फुक्सले भने प्रतिबन्धबाट छुट पाएको बताइएको छ । ह्वाइट हाउसले उक्त देशका पूर्वराष्ट्रपति जैर बोल्सोनारोलाई सेनाको कू मार्फत सत्ता कब्जा गर्न खोजेको आरोपमा न्यायबाट जोगाउन आफ्नो अभियान तीव्र पारेको द गार्जियनले उल्लेख गरेको छ ।
बोल्सोनारो, जो डोनाल्ड ट्रम्पको म्यागा आन्दोलनसँग सम्बन्धित दक्षिणपन्थी लोकप्रीय नेताका रूपमा चिनिन्छन् । सन् २०२२ को निर्वाचनमा आफ्नो वामपन्थी प्रतिस्पर्धी लुइज इनासियो लुला दा सिल्वासँग पराजित भएपछि सत्ता कायम राख्न हिंसात्मक षड्यन्त्र रचेको आरोपमा अहिले मुद्दा खेपिरहेका छन् । उनलाई केही हप्ताभित्र सर्वोच्च अदालतबाट दोषी ठहर हुने अपेक्षा गरिएको छ, र दोषी पाइएमा ४३ वर्षसम्मको जेल सजाय हुन सक्ने बताइएको छ ।
अदालतको निर्णयको दिन नजिकिँदै गर्दा ट्रम्पले अदालत र राष्ट्रपति लुलाको प्रशासनमाथि दबाब बढाइरहेको उल्ल्ेख गरिएको छ । ४ जुलाईमा ब्राजिलीय संघीय प्रहरीले बोल्सोनारोको घरमा छापा मारी उनलाई इलोक्ट्रोनिक ट्र्याकिङ ट्याग लगाएको थियो ।
