रुसी राष्ट्रपति भ्लादिमिर पुटिनका अंगरक्षकहरू सामाजिक सञ्जालमा विभिन्न कारणले बारम्बार चर्चामा आइरहन्छन् । अब उनीहरू फेरि एक अनौठो कारणले चर्चामा आएका छन् । रिपोर्टहरू अनुसार, अमेरिकी राष्ट्रपति डोनाल्ड ट्रम्पसँग अलास्कामा भएको शिखर बैठकमा पुटिनका सुरक्षा टोलीले “पुप सुटकेस“ अर्थात् मलमूत्र बोकेको सुटकेस साथमा आफ्नै देशमा लगेको बताइएको छ ।
द एक्सप्रेस यूएसको रिपोर्ट अनुसार, पुटिनका अंगरक्षकहरूले विदेशी शक्तिहरूलाई रूसी नेताको स्वास्थ्य सम्बन्धी सूचना संकलन गर्नबाट रोक्नका लागि यस्तो विशेष उपाय अपनाएका दावी गरिएको छ । यो अभ्यासलाई पहिलो पटक फ्रेन्च म्यागजिन पेरिस म्याचमा अनुसन्धानात्मक पत्रकारहरू रेजिस जेन्टे र मिखाइल रुबिनले खुलासा गरेका थिए । रिपोर्ट अनुसार, रुसको संघीय सुरक्षा सेवाका एजेन्टहरू विदेश भ्रमणका क्रममा पुटिनको मलमुत्र फोहोर संकलन गर्छन्, त्यसलाई विशेष झोलामा सिल गरेर सुरक्षा सुटकेसमा राखेर रूस फर्काइन्छ । यो अभ्यास सन् २०१७ मा फ्रान्स भ्रमणदेखि नै चलिरहेको बताइएको छ ।
पत्रकार फरिदा रुस्तामोवाले पनि यस असामान्य अभ्यासको पुष्टि गरेकी छन् । उनले भियनाको भ्रमणको बेला पुटिनले पोर्टेबल ट्वाइलेट प्रयोग गरेको उल्लेख गरेकी छन् ताकि कुनै पनि जैविक चिन्ह पछि नछाडियोस् । उनले स्रोतको हवाला दिँदै भनिन् कि पुटिनले सन् १९९९ मा सत्तामा आएदेखिनै यो अभ्यास सुरु गरिएको हो ।
यस पछाडि मुख्य कारण राष्ट्रिय सुरक्षा हो । चिकित्सकीय नमूनाहरू—जसमा मलमुत्र र फोहोर समेत पर्छ बाट कुनै व्यक्तिको स्वास्थ्य अवस्थादेखि लिएर उपचार प्रक्रियासम्मका संवेदनशील विवरणहरू पत्ता लगाउन सकिन्छ । त्यसैले पुटिनका जैविक वस्तुहरू विदेशी गुप्तचर निकायको हातमा नपरोस् भन्ने उद्देश्यले यस्तो उपाय गरिएको बताईन्छ ।
यी रिपोर्टहरू हालै फेरि चर्चामा आएका छन्, किनभने पुटिनको स्वास्थ्यबारे अघिल्लो केही वर्षदेखि व्यापक अडकलबाजी भइरहेकै छ । ७२ वर्षे पुटिनको शारीरिक चालढाल, विशेष गरी सन् २०२२ मा अस्तानामा भएको पत्रकार सम्मेलनमा उनको खुट्टा चलाएको तरिका, र २०२३ मा बेलारुसी राष्ट्रपति अलेक्जान्दर लुकाशेन्कोसँगको भेटमा देखिएको शरीरको कम्पन आदिका आधारमा धेरैले पार्किन्सन रोग जस्ता न्युरोलोजिकल समस्या भएको आशंका गरेका थिए । तर खासै यहि भएको हो भन्ने बारेमा कुनै आधिकारिक धारणा आएको छैन । तर क्रेमलिनले यी सबै दावीहरूलाई खारेज गर्दै आएको छ ।
