यस वर्ष चिकित्सातर्फको नोबेल पुरस्कार दुई अमेरिकी र एक जापानी नागरिकले जितेका छन्। शरीरको रोग प्रतिरोधात्मक प्रणालीले आफ्नै स्वस्थ कोषिकालाई आक्रमण किन गर्दैन (पेरिफेरल इम्युन टोलरेन्स) भन्नेबारे आविष्कारका लागि उनीहरूलाई पुरस्कार दिने घोषणा सोमबार गरिएको हो।
नोबेल पुरस्कार समितिका अनुसार पुरस्कार जित्नेमा अमेरिकी नागरिकहरू मेरी ई ब्रन्को र फ्रेड राम्सडेल छन् भने जापानी नागरिक डा. शिमोन साकागुची हुन्। प्रतिरोधात्मक प्रणालीले आफ्नै स्वस्थ कोषिका आक्रमण गर्दा हुने समस्यालाई अटोइम्युन रोग भनिन्छ। उनीहरूको अनुसन्धानले अटोइम्युन रोगहरूबारे प्रकाश पारेको छ।
समाचार संस्था एपीका अनुसार ६४ वर्षीया ब्रन्को सिएटलको इन्स्टिट्युट फर सिस्टम्स बायोलोजीमा वरिष्ठ कार्यक्रम प्रबन्धक छिन्। त्यस्तै ६४ वर्षीय राम्सडेल सान फ्रान्सिस्कोमा रहेको सोनोमा बायोथेराप्युटिक्सका वैज्ञानिक सल्लाहकार हुन्। ७४ वर्षीय साकागुची जापानको ओसाका विश्वविद्यालयमा रहेको इम्युनोलोजी फ्रन्टियर रिसर्च सेन्टरका विशिष्ट प्राध्यापक हुन्।
‘प्रतिरोधात्मक प्रणालीले कसरी काम गर्छ र किन हामी सबैलाई गम्भीर अटोइम्युन रोगहरू लाग्दैन भन्ने हाम्रो बुझाइका लागि उहाँहरूका आविष्कारहरू निर्णायक साबित भएका छन्,’ नोबेल समितिका अध्यक्ष ओले काम्पेले भने। उनीहरूले झण्डै १२ लाख अमेरिकी डलरको पुरस्कार राशी बाँड्ने छन्। आधिकारिक रूपमा फिजियोलोजी वा मेडिसिनतर्फको नोबेल पुरस्कार भनिने यो पुरस्कार सन् २०२५ का लागि घोषणा गरिएको पहिलो नोबेल पुरस्कार हो।
भौतिकशास्त्रतर्फको पुरस्कार मंगलबार, रसायनशास्त्रतर्फको बुधवार र साहित्यतर्फको पुरस्कार बिहीबार घोषणा गरिनेछ। नोबेल शान्ति पुरस्कार शुक्रबार र अर्थशास्त्रतर्फको नोबेल मेमोरियल पुरस्कार अक्टोबर १३ मा घोषणा हुनेछ।
