सरकारले परराष्ट्र मन्त्रालयमा हाजिर गर्नेगरी बोलाएका ११ राजदूतमध्ये चारजनाले राजीनामा दिएका छन् । उनीहरूले परराष्ट्र मन्त्रालयमा आफ्नो राजीनामा बुझाएका बताइएको छ । जसमा बेलायत, अमेरिका, कतार र चीनका लागि नेपाली राजदूतहरु रहेको परराष्ट्र मन्त्रालय स्रोतले जनाएको छ । स्रोतका अनुसार, बेलायतका लागि राजदूत चन्द्रकुमार घिमिरे, चीनका लागि राजदूत कृष्णप्रसाद ओली, कतारका लागि राजदूत रमेशचन्द्र पौडेल र अमेरिकाका लागि राजदूत लोकदर्शन रेग्मीले पदबाट राजीनाम दिएका हुन् ।
परराष्ट्र मन्त्रीको हैसियतमा प्रधानमन्त्री सुशीला कार्कीले कात्तिक १७ गते ११ देशका नेपाली राजदूतलाई कात्तिक २० गतेभित्र परराष्ट्र मन्त्रालयमा रही कामकाज गर्ने गरी बोलाउने निर्णय गरेकी थिइन् । परराष्ट्रमा रही काम गर्नेगरी बोलाइएका राजदूतमध्ये रुसका लागि नेपाली राजदूत जंगबहादुर चौहान बिरामी भएका कारण रुसमा नै रहेका छन् । स्रोतका अनुसार, उनले बिदा स्वीकृत गराएर रुसमा नै रहेका हुन् । बाँकी सबै राजदूतहरू नेपाल फर्किसकेको र चारजनाले राजीनामा गरेका हुन् ।
