अमेरिकी सिनेटले ४२ दिन लामो सरकारी बन्द अर्थात शटडाउन अन्त्य गर्ने विधेयक पारित गरेको छ। अब प्रतिनिधिसभामा मतदान भएर त्यसपछि सरकार सटडाउन खुल्नेछ । सिनेटले सोमबार राति लामो समयदेखि वित्तीय प्याकेज पारित गरे गरेर बन्दको अन्त्य हुने बाटो खोलेको हो ।
डेमोक्र्याटहरूले दिएको आठ मत र १ स्वतन्त्रसहितको सर्तमा रिपब्लिकनहरूले डिसेम्बर मध्यसम्म स्वास्थ्य सेवा कर–छूट विस्तार गर्ने प्रस्तावमा मतदान गर्न सहमति जनाएका हुन । तर, यो सम्झौताले डेमोक्र्याट समर्थक आधारभूत समूहमा असन्तुष्टि बढाएको छ। किनभने उनीहरूले स्वास्थ्य सेवा सुधार अहिलेको प्याकेजमै समावेश हुनुपर्ने माग गरेका थिए। विधेयक अब प्रतिनिधिसभामा पठाइएको छ। सभामुख माइक जोनसनले सांसदहरूलाई “तत्काल वासिङ्टन फर्कन” निर्देशन दिँदै यसै हप्ताभित्र मतदान हुने अपेक्षा व्यक्त गरेका छन्।
यस सहमतिमा कृषि मन्त्रालय र खाद्य तथा औषधि प्रशासन, सैन्य निर्माण परियोजना, सेनानिवृत्त मामिला र कंग्रेसका कार्य सञ्चालनहरूका लागि तीन वर्षको कोष विनियोजन पनि समावेश रहेको बताइएको छ ।
तथापि, यो द्विपक्षीय सम्झौताले सटडाउनको सबैभन्दा केन्द्रीय मुद्दाहरूमध्ये एक अफोर्डेबल केयर एक्ट अन्तर्गत करिब २४ मिलियन अमेरिकीहरूलाई लाभ पुर्याउने स्वास्थ्य सेवा अनुदान विस्तार गर्ने विषयलाई समाधान गर्दैन । ‘अफोर्डेबल केयर एक्ट’माथि डिसेम्बरमा मतदान गराउने सर्त राखिएको र यसमा सांसदहरू सहमत भएका छन् ।
