काठमाडौं — संयुक्त राष्ट्रसंघीय मानव बस्ती कार्यक्रम यूएन–हेबिट्याट सम्बन्धी उच्चस्तरीय कार्यक्रममा सहभागी गराउन सरकारले सहरी विकास मन्त्रालयका सचिव गोपाल सिग्देललाई नपठाई प्रधानमन्त्रीको सचिवालयका सचिव सन्तोष पाण्डेलाई न्युयोर्क पठाएको विषयले प्रशासनिक तथा कर्मचारी वृत्तमा चर्चा सुरु भएको छ।
यूएन–हेबिट्याट सहरी विकास, दिगो बसोबास, आवास नीति तथा शहरी व्यवस्थापनसँग प्रत्यक्ष रूपमा सम्बन्धित संयुक्त राष्ट्रसंघीय निकाय हो। यससँग सम्बन्धित अन्तर्राष्ट्रिय कार्यक्रममा सामान्यतः सम्बन्धित मन्त्रालयका सचिव वा प्राविधिक नेतृत्व सहभागी हुने अभ्यास रहँदै आएको छ।
तर यसपटक सहरी विकास मन्त्रालयका प्रशासनिक प्रमुख सचिव सिग्देललाई सहभागी नगराई प्रधानमन्त्रीको सचिवालयमा कार्यरत सचिव पाण्डेलाई नेपालको प्रतिनिधित्वका लागि पठाइएको छ। यस निर्णयको कारणबारे सरकारले औपचारिक रूपमा कुनै स्पष्टीकरण दिएको छैन।
पाण्डेले पूर्वाधारविकास मन्त्रीको निर्णयबाट आफू अमेरिका गएको बताए। ‘मन्त्रीज्यूको सिफारिसमा अमेरिका पुगेको हुँ। प्रोटोकल मिलाएरै गएको हुँ। मन्त्रीज्यू कार्यव्यस्ताकाका कारण जान सक्नुभएन। उहाँले मलाई सिफारिस गर्नुभएको हो’, पाण्डेले भने, ‘मन्त्रीज्यूका लागि निमन्त्रणा आएको हो। उहाँले आफू नगएर मलाई पठाउनुभएको हो।’
प्रशासनिक वृत्तका अनुसार सम्बन्धित मन्त्रालयको नेतृत्वलाई बाइपास गरेर प्रधानमन्त्रीको सचिवालयका अधिकारीलाई अन्तर्राष्ट्रिय कार्यक्रममा पठाउने निर्णयले संस्थागत कार्यप्रणाली, जिम्मेवारीको बाँडफाँट तथा प्रशासनिक परम्पराबारे प्रश्न उठाएको छ। यद्यपि प्रधानमन्त्री कार्यालय वा सहरी विकास मन्त्रालयले यस विषयमा सार्वजनिक प्रतिक्रिया जनाइसकेका छैनन्।
