न्युयोर्कमा नेपालका प्रधानमन्त्री केपी शर्मा ओली र भारतका प्रधानमन्त्री नरेन्द्र मोदीबीच ७९ औं संयुक्त राष्ट्र संघको महासभामा भाग लिन आएको मौकामा द्विपक्षीय भेटवार्ता हुने भएको छ । भारतीय प्रधानमन्त्री मोदीसँग न्युयोर्कमा नेपालका प्रधानमन्त्री ओली न्युयोर्कमा शुक्रबार राति उत्रनु केही घन्टाअघि भारतीय पक्षले मोदी द्विपक्षीय भेटवार्ताको लागि तयार गरेको सन्देश दिएको बताइएको छ ।
परराष्ट्र स्रोतका अनुसार लामो समयदेखि साइडलाइनमा भेटवार्ताको लागि गृहकार्य भए पनि भारतीय पक्षबाट दुई प्रधानमन्त्रीबीच भेटवार्ता हुने सक्ने सन्देश शुक्रबार प्राप्त भएको हो । स्थानीय समयअनुसार भोली आइतबार ओली र मोदीको साइडलाइनमा द्विपक्षीय भेटवार्ता हुनेछ । ्रचौथो पटक ओली प्रधानमन्त्री भएपछि भारतीय प्रधानमन्त्री मोदीसँग पहिलो भेटवार्ता हुनेछ । भारतीय पक्षले प्रधानमन्त्री ओलीको अघिल्लो कार्यकालमा शुरु गरेको चुच्चे नक्साका कारण केहि धुमिल भएको कुटनीति यस पटक प्रधानमन्त्रि हुँदासम्म सुधार हुन सकेको छैन ।
मोदीसँग भेटवार्ता हुने भएपछि नेपाली पक्षले त्यसको लागि आवश्यक गृहकार्य शुरु गरेको छ । दुई प्रधानमन्त्रीबीच भेटवार्ता गराउनको लागि नेपाली पक्षले विभिन्न तहबाट पहल गरेको थियो । परराष्ट्रमन्त्री आरजु राणा देउवादेखि न्युयोर्कस्थित राष्ट्र संघका लागि नेपाली प्रतिनिधि लोकबहादुर थापा तथा नयाँ दिल्लीस्थित नेपाली दूतावासलाई पनि परिचालन गरिएको थियो । प्रधानमन्त्री ओलीले साइडलाइन भेटवार्ताको लागि मन्त्री राणालाई नै निर्देशन दिएर मन्त्रालयलाई काम गर्न भनेका थिए । परराष्ट्रमन्त्रि राणाले यस भेटघाटका लागि निकै कसरत गरेकी थिईन ।
भदौ २५ बाट महासभा सुरु भइसकेको छ । महासभाको उच्चस्तरीय छलफल असोज ८ देखि १२ सम्म चल्ने छ । नेपालको २२ सदस्य प्रतिनिधमण्डलको नेतृत्व गरेर प्रधानमन्त्री ओली न्युयोर्क पुगिसकेका छन् । यसपटक असोज ७ र ८ मा भने राष्ट्रसंघकै आयोजनामा ‘समिट अफ द फ्युचर’ कार्यक्रम छ । त्यसमा पनि ओलीले सम्बोधन गर्ने कार्यक्रम छ । त्यसको लागि शुक्रबारबाट भने समिट अफ द फ्युचरको एक्सन डे सुरु भइसकेको छ । भारतका प्रधानमन्त्री मोदी भने समिट अफ द फ्युचर कार्यक्रममा सहभागी भएर सम्बोधन गर्नको लागि मात्र न्युयोर्क आउन लागेका हुन् ।
मोदी शुक्रबार अमेरिकाको विल्मिङटनमा चार मुलुकहरुको संगठन क्वाडमा अमेरिका, भारत, जापान र अस्ट्रेलियाको बैठकमा सहभागी हुन आइसकेका छन् । ्रओली पहिलो र दोस्रोपटक प्रधानमन्त्री हुँदा भारत भ्रमणबाटै विदेश यात्रा थालेका थिए । तर तेस्रोपटक भने उनी तीन महिनामात्र प्रधानमन्त्री रहे र कुनै पनि मुलुकको भ्रमण गरेनन् । ओली २०७२ सालमा पहिलो पटक, २०७४ सालमा दोस्रो र २०७८ सालमा तेस्रोपटक प्रधानमन्त्री भएका थिए । चौथो पटक प्रधानमन्त्री भएपछि ओलीको विदेश भ्रमण न्युयोर्कमा हुने महासभाबाट हुने भएको छ ।
ओली यसपटक प्रधानमन्त्री भएपछि भारतीय पक्षबाट हालसम्म औपचारिक भ्रमणको लागि कुनै पनि निमन्त्रण आएको छैन । तर ओलीले भने परराष्ट्रमन्त्री राणाको भारत भ्रमणको क्रममा मोदीलाई नेपाल भ्रमणको औपचारिक रुपमा निमन्त्रणा पठाएका थिए । चुच्चे नक्सामा असन्तुष्टि जनाई रहेका भारतीइ पक्ष तत्काल ओलीलाई भारत बोलाउने पक्षमा नरहेको बताईन्छ । भारतीइ पक्षले चुच्चे नक्सा एक सय रुपियाको नोटमा छापिएपछि थप संवेदनशील भन्दै आएको छ ।
